Canterbury

De Wikipedio
Irez ad: pilotado, serchez
Katedralo di Canterbury.

Canterbury esas urbo en sud-esto di Unionita Rejio, en Kent komtio. Ol havis 143 700 lojanti ye 2005. Lua totala surfaco esas 308,84 km². Ol esas la sideyo di Arkiepiskopo di Canterbury, chefo di Angliana eklezio.

La eniro a la domeno di la katedralo

Historio[redaktar | edit source]

Esis kolonio ye ca loko, establisita c. 300 aK; ol esis centro di la tribuo Belgae kande la Romani invadis. Plura yari pos la departo di la Romani, ol divenis Saxona urbo Cantwarbyrig.

En 597, Santa Augustinus arivis en Kent, sendita adhike da Papo Gregorius 1ma. Ante ke il mortis en 604 il facis multo por establisar Kristaneso en Anglia; partikularle, il fondis la katedralo di Canterbury.

Ye 8 di septembro 1011, Canterbury esis asiejata da Dana armeo; la asiejo duris til 29 di septembro. Lo esis evento dum la kampanio di Thorkell la Alta, Dana chefo qua arivabis en Anglia en agosto 1009 kun sua armeo, e spoliabis plura urbi en sud-estala Anglia. Pro trahizo di ula Aelfmaer, la armeo eniris Canterbury; Aelfheah, la arkiepiskopo di Canterbury, esis sizata kom gajo-homo e la katedralo esis spoliata ed incendiata. Aelfheah refuzis permisar pago di ransono por sua liberigo, e ye 19 aprilo 1012 il esis ocidata da ebria Dana soldati. Ye pasko 1012 la Angla guvernerio, por haltigar la kampanio di Thorkell, pagis 17 900 kg de arjento kom "Danegeld": tributo a la Dani.

La saxona katedralo destruktesis da fairo en 1067; nova strukturo, en Normanda stilo, kreesis da arkiepiskopo Lanfranc ed ilua sucedanto Anselm.

En 1170 arkiepiskopo Thomas Becket ocidesis en la katedralo da kavalieri qui supozis ke li agas por la rejulo Henrik 2ma di Anglia. To esis kauzo di multa chagreno di la rejulo en posa yari.

La navo di la katedralo

La nuntempe edifico di la katedralo desegnesis da William di Sens, qua desegnis la koro e la apsido pos fairo di 1174, e Henry Yevele, qua desegnis la navo en 1374. La centrala turmo desegnesis da William Westall en la 15ma yarcento.