Ernest Shackleton

De Wikipedio
Ernest Henry Shackleton
Okupeso: explorero
Lando: Unionita Rejio
Naskodato: 15 di februaro 1874
Nasko-loko: Kilkea, Irlando
Mortodato: 5 di januaro 1922
Morto-loko: Grytviken, Suda-Georgia

Ernest Henry Shackleton (1874 til 1922) esis explorero di Antarktika.

Il naskis ye 15 di februaro 1874 en Kilkea, proxim Dublin, Irlando.

Il esis membro di la unesma expediciono di Robert Falcon Scott ad Antarktika 1901–1904.

Il esis duktisto di expediciono ad Antarktika 1907–1909. La marcho vers la polo komencabis ye 29 di oktobro 1908, pos arivo ye la marbordo di Antarktika sur la navo Nimrod frue en ta yaro. Ye 9 di januaro 1909, pos du dii en tendo pro tempesto, Shackleton e tri altra membri di ilua expediciono facis lasta marcho vers la sudo, ed atingis lia maxim proxima disto, 180 km de la suda polo, latitudo 88° 23' S. Ol tatempe esis la maxim fora sudala poziciono atingita da irgu. Konciante ke li ne havas suficanta manjajo por pluse irar vers la suda polo e posvivar, li mustis retroirar.

Ilua maxim famoza expediciono ad Antarktika esis de 1914 til 1916. Ye 8 di agosto 1914 la navo Endurance departis de Plymouth, Anglia, seglirante vers Antarktika; ol pauzis ye South Georgia en la suda Oceano Atlantiko, de qua ol departis ye 5 di decembro. Cafoye il intencis irar trans Antarktika, de la Weddel-maro a la Ross-maro. Frue en 1915 la navo divenis kaptita en la glacio di la Weddell-maro, ante ke la voyajo sur tero povis komencar; pos pasir la vintro di 1915 en la glacio, la navo esis aplastata. Pos plura aventuri, omna membri dil expediciono esis salvata en 1916. Erste lore, depos lia departo, li povis saveskar la developado di la mondomilito qua komencabis kurte ante lia departo.

Il mortis ye 5 di januaro 1922, dum plusa expediciono ad Antarktika.

La navo Endurance en glacio di Antarktika