Historio di Barbados

De Wikipedio
Irez ad: pilotado, serchez

L'unesma habitanti di Barbados esis indijeni Arawaki e Karibi, qui arivis al insulo de Sud-Amerika cirkum 350 til 400 aK. Portugalani vizitis l'insulo en 1536 ma ne koloniigis ol. Hispani anke vizitis l'insulo ma ne okupis ol. Kelk Arawak-indijeni de Britaniana Guyana enmigris a l'insulo dum la 1800a yari, e kontinuas vivar ibe.[1]

James Hay, 1ma komto de Carlisle, Lord Proprietor ("Lord proprietanto") de Barbados.

Unesma Angliani arivis en la navo Olive Blossom, e desembarkis en la regiono di nuna Holetown en 1625. Li okupis l'insulo en nomo dil rejulo James 1ma, e komencis kultivar sukrokano en 1640[2] e transportis Afrikana sklavi por kultivar ol.

En 1780 forta uragano mortigis 4,000 personi. En 1854 un epidemio di kolero mortigis plu kam 20,000 personi.[3]

Barbados sempre havis granda autonomio: unesma lokala asemblajo instalesis en 1639. En 1807, Britaniani abolisis la komerco di sklavi, ma ne la sklaveso. En 1816 okuris granda revolto di sklavi, en qua 20,000 sklavi partoprenis. La revolto faliis, e 120 sklavi mortigesis en kombati od exekutesis imediate. Altra 144 judiciesis ed exekutesis pose. Sklaveso fine abolisesis en 1833. La nombro di sklavi ta yaro esis 83,000.

En 1884 membri de la societo dil agrokultivisti di Barbados skribis letro a Francis Hincks, Kanadana politikistulo, e demandis por l'admiso di Barbados en Kanadana Konfederuro. Tamen, proprietanti di plantaceri e Britanian-decendanta komercisti formacis la majoritato di la personi kun yuro por votar, e ne aceptis ta ideo. Plu kam 70% de la habitantaro, specale mulieri, ne havis yuro por votar.

La portuo di Bridgetown en 1902.

Nur dum 1930a yari la decendanti di sklavi komencis revendikar politikala yuri. Un di chefi de ta movado, Grantley Adams, fondis la partiso Barbados Labour Party en 1938.

En 1952 la jurnalo Barbados Advocate konsultis diversa Barbadana politikisti, advokati ed entraprezisti e deskovris ke li esis favorebla ad federuro kun altra Karibean insuli. De 1958 til 1962 Barbados esis membro di la West Indii Federuro.

Flago di Barbados, adoptita pos la nedependo.

Barbados divenis nedependanta de Unionita Rejio en 30 di novembro 1966 kom monarkio, kun Elizabeth 2ma kom rejino e J.M.G.M. Adams, filiulo di Grantley Adams, kom chefministro. De 1946 til 1980 la procento-kresko dil habitantaro diminutis 1/3 por l'enmigro vers Unionita Rejio.[4]

En 1983 Barbados ed altra Karibeana landi unionis kun Usa por invadar Grenada ed ekpulsar marxista rejimo.[5] En 1985 J.M.G.M. Adams mortis, e Bernard Saint John divenis chefministro.

Referi[redaktar | edit source]

  1. "Origin of the Eagle Clan", Pan-Tribal Confederacy of Indigenous Tribal Nations.
  2. Barbados: Just Beyond Your Imagination. Hansib Publishing (Caribbean) Ltd. 1997. p. 46, 48. ISBN 1-870518-54-3
  3. "Barbados". Library of Congress Country Studies.
  4. "Barbados – population". Library of Congress Country Studies.
  5. Enciclopédia Delta Universal - vol. 1 - Editora Delta, Rio de Janeiro, Brazilia. Pag. 1149-1150