Historio di Bolivia

De Wikipedio
Irez ad: pilotado, serchez

Ja existis civilizeso en la regiono di Tiahuanaco de 4ma til 10ma yarcento. Malgre ta, arkeologiisti poka savas pri ta civilizeso, ecepte ke facis granda konstrukturi di petro kun imaji di animali. Posible ta populo dekadis pos 10ma yarcento. Cirkum yaro 1200 inkai okupis la regiono e vicina monti. Inkao imperio developis til 1535 kande Hispaniani destruktis l'imperio[1].

Hispaniani establisis kolonii en la regiono dum 16ma e 17ma yarcenti. Pos deskovrar arjento en Potosí Hispania koncentris lua atenco en Bolivia, e nomezis la regiono Alto Perú. Ye 1559 la regiono divenis parto di Vice-Rejio di Peru, kun chef-urbo en Sucre[1]. Dum koloniala periodo okuris multa rebelioni nesucesoze di indijeni, specale de fino di 18ma yarcento til komenco di 19ma yarcento.

Bolivia divenis nedependanta de Hispania ye 6 di agosto 1825. Simón Bolívar helpis Antonio José de Sucre dum nedependeso-milito. Por ca motivo, lando recevis la nomo Bolivia. Ye 1826 Antonio José de Sucre divenis l'unesma prezidisto di lando[1].

Dum la guvernio de Andres de Santa Cruz ye 1836, Bolivia invadis Peru e formis Bolivia-Peru Konfederuro. Kun la falio di invado, konfederuro finis.

Inter 1879 e 1883 okuris Pacifiko-milito, kontre Chili. Kom rezulto, Bolivia perdis lua aceso ad Oceano Pacifiko.

Ye 1903, kun Petrópolis-kontrakto, Bolivia perdis la regiono di Acre a Brazilia. Dum Unesma mondomilito lando restis neutra. De 1932 til 1935 Bolivia militis kontre Paraguay en Chaco-milito. Kom rezulto, Bolivia perdis granda parto di la regiono di Chaco a Paraguay.

De 1935 til 1952 okuris diversa armeala rebelioni. Ye 1943 lando deklaris milito kontre Nacista Germania ma lando ne sendis soldati por kombatar en Europa. Ye 1945 lando divenis membro dil Unionita Nacioni[1].

CIA entrenis e furnisis pekunio a Boliviana militisti dum 1960a yari. Che Guevara esis mortigita ye 9 di oktobro 1967 da Boliviana militisti kun helpo di CIA. Ye 1979 ed ye 1981 okuris elekti kun akuzi di fraudi. On okuris stato-stroki ed armeala guverni. Ye 1980 militisto Luis García Meza asumis povo pos violenta stato-stroko qua ne havis populala suporto. Dum lia guvernisteso okuris violento di homala yuri, augmentis la vendo di drugi, ed ekonomiala kaoso, kun granda kresko di inflacio. Armeala rebeliono ekpulsis lu de povo ye 1981. Ye 1982 la rezulto di elekti ke okuris ye 1980 esis proklamita, e Hernán Siles Suazo asumis povo, e guvernis til 1985. Ta yaro okuris anticipita elekti, e Víctor Paz Estenssoro asumis povo por guvernar 4 yari, til 1989.

Referi[redaktar | edit source]

  1. 1.0 1.1 1.2 1.3 Enciclopédia Delta Universal, vol 3 - pag. 1337 til 1343. Editora Delta, Rio de Janeiro, Brasil, 1989