Historio di Nijer

De Wikipedio
Irez ad: pilotado, serchez
Flago di Nijer.

De 10.000 aK til aproxime 3.000 aK parto di Nijer, nune okupata da Sahara, esis kovrita da fertila herbala agri. Cirkum 2000 yari ante nun, granda parto di teritorio esis kovrita da dezerto.

Un di precipua anciena imperii di regiono esis Songhai (c. 1340-1591) kun chefurbo en Gao, nune parto di Mali.

Palaco dil sultano en Zinder, 1906.

Dum la 19ma yarcento unesma Europana exploreri, Britaniana Mungo Park e Germana Heinrich Barth, exploris la regiono di Nijer fluvio. Francia komencis okupar la regiono en 1900 ed, en 1922, ol divenis Franciana kolonio.

Nijer divenis nedependanta de Francia ye la 3ma di agosto 1960. Dum 14 yari pos la nedependeso, Hamani Diori esis la prezidanto, e lando havis un unika politikala partiso. En 1974 il esis renversita da stato-stroko, e kolonelo Seyni Kountché asumis povo til lia morto en 1987. Lia sucedanto, kolonelo Ali Saibou liberigis politikala karcerani, promulgis nova konstituco e kreis la Duesma Republiko kun singla partiso. Quankam la liberala reformi, studenti kontinuis presi por plusa demokratio, qua permisus multa partisi. En 1990 komencis rebeliono di Tuaregi.

Nova partisi permisesis en 1991, e la Triesma Republiko komencis en 1993. En 1995 okuris elekti, e por l'unesma foyo la prezidanto e la chefministro partoprenis a diferanta partisi. To kreis un paralizeso en la guverno, ed un motivo por kolonelo Ibrahim Baré Maïnassara komandar stato-stroko e renversar la Triesma Republiko en januaro 1996.

En mayo 1996 Baré anoncis la Quaresma Republiko. Il organizis elekto por prezidanto en julio sam yaro. Kande la votado komencis, il substitucis tota l'elektala komiso. La nova komiso deklaris Baré la prezidanto, e lia partiso recevis 57% de voti por la parlamento.

Ye la 9ma di aprilo 1999 Baré mortigesis dum stato-stroko komandita da Daouda Malam Wanké, qua establisis transito-guverno e skribis la nuna konstituco. Nova elekti por prezidanto okuris en oktobro e novembro 1999, e Mamadou Tandja elektesis.

Til februaro 2010 Nijer esis parlamentala republiko, kun Tandja Mamadou kom prezidanto. Ye la 18ma di februaro il esis renversita da stato-stroko e Salou Djibo asumis povo kom "prezidanto di suprema konsilantaro por restauro di demokratio" (en Franciana Conseil suprême pour la Restauration de la Démocratie - CSRD) e divenis chefo di stato de facto. Ye 25 di februaro 2010 Mahamadou Danda divenis nuna chefministro.

Pos prezidantala elekto ye januaro (1ma foyo) e marto (2ma foyo), ye 7 di aprilo 2011 Mahamadou Issoufou asumis kom prezidanto.


Historio di Afrika
Aljeria | Angola | Benin | Botswana | Burkina Faso | Burundi | Centrafrika | Chad | Demokratial Republiko Kongo | Djibuti | Egiptia | Equatorala Guinea | Eritrea | Etiopia | Gabon | Gambia | Ghana | Guinea | Guinea Bisau | Ivora Rivo | Kabo Verda | Kamerun | Kenia | Komori | Kongo | Lesotho | Liberia | Libia | Madagaskar | Malawi | Mali | Maroko | Maurico | Mauritania | Mozambik | Namibia | Nigeria | Nijer | Ruanda | Sao Tome e Principe | Senegal | Sierra Leone | Seycheli | Somalia | Sud-Afrika | Sudan | Sud-Sudan | Swazilando | Tanzania | Tunizia | Togo | Uganda | Zambia | Zimbabwe
Dependanta teritorii

Ceuta | Kanarii | Madeira | Melilla | Westala Sahara | Mayotte | Reunion | Sokotra

Ne agnoskata nedependesi
Somalilando | Puntlando