Historio di Oman

De Wikipedio
Bat, Al-Khutm ed Al-Ayn, arkeologiala situi de la 3ma yarmilo aK situita che regiono Ad Dhahirah, nun esas mondala patrimonio di la homaro.

Homala restaji evante de fer-epoko (cirkume 8 000 yari ante nun) trovesis en la regiono di la nuna Oman. Sumeriani mencionis regiono nomizita "Magan" o "Makan", posible referante a minado di kupro en la regiono. Posible la nuna Omanani originis de Yemen, sude del Araba peninsulo.

Ante l'adopto di Islamo, Oman administresis od influesis da Persiana dinastii: Akemenid, Partiani e Sasanid. Dum la 8ma yarcento Mohamedana religio arivis en la regiono, ed Omanani esis un ek l'unesma populi qui adoptis islamo.

Fuorto Nakhal, konstruktita dum la 17ma yarcento.

Portugalani konquestis Muscat dum la 16ma yarcento ed okupis ol de 1508 til 1648, kande lua dominio sukombis en manui di Otomani. Nek Portugalani nek Persiani kontrolis komplete tota regiono di la nuna Oman. Dum la yari 1690a, Omanan imamo Saif bin Sultan probis konquestar est-Afrikana litoro. Un ek l'obstakli por ta konquesto esis Fuorto Jesus, Portugalana fortreso en Mombasa. Pos du-yara siejo, bin Sultan kaptis la fuorto en 1698, e konquestis tota regioni norde de Mozambik. Zanzibar divenis loko por komercar sklavi e divenis importanta por Omanan imperio. Sultano Sa'id bin Sultan konstruktis granda palaci, e transferis lua rezideyo a Zanzibar en 1837. Omanani ank influis en Komoriana kulturo ed, en 1783, pos vinkir la sultano di Muscat, Oman grantis suvereneso sur urbo Gwadar, en la nuna litoro di Pakistan.

Standardo dil sultanio Oman.

Britaniani komencis influar en Oman depos la 18ma yarcento. Kun la morto di Sa'id bin Sultan al-Busaid en 1956, lua filiuli disputis la sucedo e dividis l'imperio. Thuwaini bin Said recevis Muscat e Oman, e Mayid bin Said recevis Zanzibar. En 1891, Oman divenis protektorato del Unionita Rejio e restis tale til lua nedependo. En 1970, Qaboos bin Said Al Said helpesis da Britaniani por revokar ilua patro, Said bin Taimur, e proklamis la lando sultanio. Kom sultano, Qaboos bin Said Al Said komencis modernigar Oman e finis l'internaciona izolado di la lando. Sklaveso proskriptesis ye la sam yaro. En 1971 ilu proklamis la nedependo di Oman. En 1981 Oman divenis un ek la fonderi dil Konsilistaro pri Koopero dil Gulfo, e per rejala dekreto de 1997, mulieri darfis votar. Rn 2002, omna civitani evante 21 yari o pluse darfis votar.

Dum la komenco di 2011, eventis protesti en Oman inspirita per tale nomizita "Araba Printempo". La protesti demandis politikala reformi, plubonigo di la vivo-stando, e diminuto di la chomeso.