John Constable
John Constable (11ma junio 1776 - 31ma marto 1837) esis angla romantika piktisto. Naskinta en Suffolk, il konocesas precipue pro sua peizajo-pikturi di Dedham Vale, la areo cirkum lua hemo - nun konocata kom "Constable Country" - quin il instilis per intenseso di afeciono. "Me piktas mea propra loki maxim bone", il skribis a sua amiko John Fisher en 1821, "piktado esas nur altra vorto por sento".
Lua maxim famoza pikturi inkluzas Wivenhoe-Parko di 1816, Dedham Vale di 1802 e The Hay Wain di 1821. Malgre ke lua pikturi esas nun inter le maxim populara e valoroza en britana arto, Constable nultempe sucesis pekuniale. Il divenis membro dil establisuro erste il elektesis a la Rejala Akademio kande il evis 52. Lua verkaro embracesis en Francia, ube il vendis plu multa verki kam en sua hemlando Anglia, ed inspiris la Barbizon-skolo.
La arto da Constable sempre penetresas da dezirego, melankolio e deziro a simpla, naturala vivo, a rustika, pastorala idilio, a rurala temi ed elementi di vivo en la ruro, "ora epoko" kande homi kunvivis en harmonio kun naturo, mondo desapareskanta kande il piktis sua peizaji danke la komenco dil Industriala Revoluciono. Il konciis pri la temo di urbana kresko, dil desagreableso di urbana vivo - kontraste vivo en la ruro.
Lua arto esis kelke nenormala luatempe, il amis lo simpla, naturala peizajo sen ruinaji, dramatala efekti od exaltita, ofte ecesanta senti, quala ti en la pikturi da lua samtempano J. M. W. Turner. Lua peizaji inundesas da arjentea brilanta lumo en la aquo ed aero ed en la cielo - karakterizata da specala intenseso qua esas tante importanta traito dil verki da ca artisto.