Kriti

De Wikipedio
Irez ad: pilotado, serchez
Lokado di Kreta en Grekia.

Kreta jacas en estala Mediteraneo. Ol esas la kinesma granda insulo di Mediteraneo e la maxim granda insulo di Grekia. Lua longeso esas 250 km ma ol esas nur ye 12–60 km larja.

La prehistoriala urbo Knossos[redaktar | edit source]

Ye la16 di marto 1900 l'arkeologo Arthur Evans kompris tereno en la insulo Kreta, ube situesas la restaji di la prehistoriala urbo Knossos. La ruinaji deskovresis da lokala komercisto en 1878, e kelka exkavadi facesis. Evans (1851–1941) komencis explorar la exkavuri en 1894. Pos la kompro, plu granda exkavadi facesis da multa lokala laboranti employita da Evans. Pos du monati la restaji di granda parto di la "Palaco di Minos" (tale nomizita da il) esis expozita. L'exkavadi duris dum plura yari. La civilizuro montrita per la restaji existis de la2500 aK til la1200 aK, dum qui prosperis diversa arti. Argila skribotabeleti esis trovata, montranta du tipi di literi, nomizita linear A e linear B.

La duesma tipo, en frua Grekiana linguo, esis deschifrita en 1952 da Michael Ventris. Ilua intereso komencis en 1936 kande, kom skolano, il asistis diskurso di Arthur Evans. Dum ke il sequis kariero kom arkitekto, il duris studiar linear B, konstatante ke ol esis Grekiana linguo. Il mortis en automobilo-acidento en 1956, evante 34 yari, kelka semani ante ke ilua edituro pri la linguo aparis.