Wright fratuli

De Wikipedio
(Ridirektita de Orville Wright)
Irez ad: pilotado, serchez

Orville Wright (19 di agosto 1871 til 30 di januaro 1948) e sua frato Wilbur Wright (16 di aprilo 1867 til 30 di mayo 1912) esis pioniri en flugado per motorizita aeroplani.

Le Wright esis biciklo-fabrikisti, e lo explikas multa teknikala rezolvi en konstrukto dil unesma aeroplano fluginta.[1] La biciklo-fabrikerio di la fratuli financale suportis la experimenti, qui komencis en 1900.

Le Wright esis longe interesata pri flugado. Unesme li konstruktis kaiti, pose glitili. Li igis anke probi en vento-tunelo pro lernar aerodinamiko e pro plu bone studiar la funcionado di ali. Li studiis la skriburi di Otto Lilienthal (qua experimentis en Germania pri glitanta aparati e mortis ye 1896 en probala flugo). Kom exemplo por la aeroplano le Wright ne havis la konstrukto di ucelo, quale altra konstuktisti havis.

Li konstruktis specala motoro qua esis suficante mikra por flugo-aparato. Orville flugis unesme per aeroplano sustenata per motoro ye 17 di decembro 1903. La flugo-probeyo esis en Kitty Hawks, Nord-Karolina che esta rivo di Usa.[2] L’unesma flugo startis alonge reli, pro ke l’aeroplano havis nula rotuli o stipito, ma nur du plani e motoro. L’unesma flugo duris 12 sekundi e 35 metri. Samadie Orville flugis duesmafoye: 59 sekundi e 860 metri, ma l’aeroplano krulis en ventego divenante ne-flugebla.

La Wright-fratuli povis konstruktar fluganta vehilo, ma ye 1908 Orville tervenis krulante, kande li introduktis la vehilo a reprezentanti di Usan armeo. Pasajero lietnanto Thomas Selfridge mortis ed Orville mustis esar en hospitalo sep semani.

Ye 23 di marto 1903 Orville e Wilbur Wright depozis demando di patento por nova flugilo. Le Wright volis posedar omna patento-yuri dil aeroplano. Pro to la developo dil aeroplano kelke tardeskis. Ma frato Wilbur mortis ye 1912 e la developo dil aeroplano divenis omnaloke en mondo tale intensa dum unesma mondomilito, ke Orville ne plue povis o volis surveyar patentala yuri.

Referi[redaktar | edit source]

  1. (1897) Wilbur Wright Working in the Bicycle Shop. URL vidita ye 2013-07-22.
  2. (1903-12-17) Telegram from Orville Wright in Kitty Hawk, North Carolina, to His Father Announcing Four Successful Flights, 1903 December 17. URL vidita ye 2013-07-22.