Rio Grande do Sul

De Wikipedio
Irez ad: pilotado, serchez
Rio Grande do Sul
Bandeira do Rio Grande do Sul.svg Brasão do Rio Grande do Sul.svg
Chef-urbo Porto Alegre
Rio Grande do Sul in Brazil.svg
Totala surfaco 281,730 km²
Habitanti
Lojanto-denseso
10,187,842 (2010)
39.29 hab./km²
Guberniestro Tarso Genro
Reto www.rs.gov.br

Rio Grande do Sul esas stato de la Suda regiono di Brazilia. Ol esas vicino di Santa Catarina en nordo, Arjentinia en westo ed Uruguay en sudo. En esto jacas Oceano Atlantiko. Chef-urbo: Porto Alegre.

Bazala fakti pri Rio Grande do Sul.

Historio[redaktar | edit source]

Unesma habitanti di nuna Rio Grande do Sul esis indijeni de rasi Minuani, Charrua e Caaguara. Kande Hispaniani e Portugalani dividis lua zoni por koloniigo da Tordesillas-kontrato en 1494 la regiono jacis sub Hispaniana domeno, ma l'exakta frontiero inter la du teritorii esis necerta. Hispana Jezuiti penetris en la regiono de nuna Uruguay por katekizar indijeni e fondis l'unesma misioni en 1627, dum ke Portugalani e Paulistas (personi naskinta en nuna Sao Paulo) penetris en la regiono de la nordo, por arestar indijeni ed uzar kom sklavi. L'exodo di indijeni de la regiono komencis en 1637 pos ataki komandita da Portugalana António Raposo Tavares.

Ruini di jezuita misiono en São Miguel das Missões.

En 1680 Jezuiti abandonis la regiono ed establisis la misioni en la westala rivo di Uruguay fluvio, ma en 1687 li establisis sep kolonii (São Francisco de Borja, São Nicolau, São Luiz Gonzaga, São Miguel Arcanjo, São Lourenço Mártir, São João Batista, Santo Ângelo Custódio) en l'estala rivo, en la regiono nune konocita kom Sete Povos das Missões. En la regiono existis bovala bestiaro en misovaja stando. Introduktita da Hispaniani dum la komenco di la koloniigo, l'animali fugis dum la frequenta ataki kontre la misioni, e nutris su de naturala pastureyi di la regiono. L'animali anke atraktis l'interesto di Portugalani e Braziliani, qui kaptis ol e vendis la karno, la ledro o la viva animali por uzar kom transporto-moyeno en la recente deskovrita mineyi en Minas Gerais.

Rio Grande do Sul esis strategiala regiono inter Portugalana kolonio en Colonia del Sacramento e l'urbeto di Laguna, lore la maxim sudala urbo en Brazilia. En 1737 Portugal sendis militala expediciono por okupar la regiono, ed, en 1742 l'urbo di Porto dos Casais, nuna Porto Alegre, fondesis kun la helpo di Acoriana koloniigisti. En 1777, tra la Santo Ildefonso-kontrato, Portugal recevis definitive la regiono.

Kun Braziliana nedependo Rio Grande do Sul divenis provinco di Braziliana Imperio. En 1835 okuris la Farrapos-milito: la provinco kombatis la centrala guverno di regenteso. La milito lastis til 1845.

Depos 1889 kun la republiko, Rio Grande do Sul divenis stato. En 1930 Getúlio Vargas, lore guberniestro dil stato, komandis stato-stroko qua renversis la Olda Republiko, politikale komandita da Sao Paulo e Minas Gerais.

Geografio[redaktar | edit source]

Edifici en Porto Alegre.
Itaimbezinho ravinego, en la nordesto di Rio Grande do Sul.

La maxim granda urbi dil stato esas Porto Alegre, Pelotas, Caxias do Sul, Canoas, Rio Grande e Santa Maria. La totala surfaco dil stato aproxime equivalas a de Equador.

La stato havas du klimati: humida subtropikala ed temperema oceanala. Pluvo esas plu intensa (mezvalore 1,900 mm omna yari) en la regiono di la Serra Gaúcha. On povas okurar nivo en alta regioni dum poka dii dil vintro.

La triima de lua teritorio apartenas a la baseno di Plata fluvio. Uruguay fluvio en la westo dil stato esas la naturala frontiero kun Arjentinia. La fluvii en l'altra du triimi dil teritorio apartenas a la baseni di lagi Lagoa dos Patos, Lagoa Mirim ed altra mikra. La tereni dil stato esas basa en la nordwesto, la centro, la sudo e la litoro dil stato, ed alta en la nordesto, en la regiono konocita kom Serra Gaúcha. La maxim alta monto esas Pico do Monte Negro, kun 1,410 metri di altitudo.

Ekonomio[redaktar | edit source]

Mutoni en la naturala pastureyi de la Campanha Gaúcha.
Automobilo fabrikita da General Motors en lua fabrikerio en Gravataí.

La precipua ekonomikala produkti di agrokultivo en stato esas soyo, frumento, maizo e rizo. La edukado di bovi e mutoni anke esas tre importanta: bovi furnisas ledro por shu-fabrikerii en la regiono dil valo di Rio dos Sinos fluvio. Vit-beri (specale de varietati Chardonay, Cabernet Sauvignon e Merlot) anke kultivesas por produktar vino.

La industrio koncentras su en Porto Alegre e lua metropolala regiono (l'urbi di Canoas, Novo Hamburgo, Gravataí, São Leopoldo e Viamão). Alimenti e drinkaji (inkluze vino produktita en la Serra Gaúcha), mashinifado (inkluze automobili), mobli, shui e metalurgio esas la precipua.

Turismo[redaktar | edit source]
Plajo di Guarita, en Torres.

En litoro, jacas turistala urbi di Torres e Tramandaí, kun plaji qua recevas turisti de stato ed anke de Santa Catarina, e de vicina landi, Arjentinia e Uruguay dum somero.

Lago Negro ("Nigra Lago") en Gramado.

En la Serra Gaúcha (la maxim alta regiono di stato, kun kolda vintri) jacas urbi fondita da Italiani (Caxias do Sul, Garibaldi, Bento Gonçalves) e da Germaniani (Canela, Gramado, Nova Petrópolis). L'urbi havas bela naturala peizaji (kom exemplo, Caracol Aquofalo, en Canela) e historiala domi e konstrukturi di unesma enmigranti. En maxim alta punti di Serra Gaúcha povas nivar en kolda dii di vintro.