Shablono:Eventi
dum aprilo
50, 100 e 150 yari ante nun …
13 di aprilo 1974. La Usana artificala satelito Westar 1 lansesis, da la kompanio Western Union. Ol esis la unesma komercala komuniko-satelito en geostacionara orbito cirkum Tero. Ol utilesis da Western Union por olua propra komuniki, exemple telegrami, ed anke utilesis da olua klienti, exemple televiziono-kompanii qui transmisis programi per la satelito a lokala stacioni. Westar 1 esis la unesma de kin sateliti lansita da Western Union de 1974 til 1982. Olua servado finis en aprilo 1983.
12 di aprilo 1924. En Saint-Denis sur la Franca insulo Reunion, la politikisto Raymond Barre naskis. La familio rezidabis en Saint-Denis depos 1843, ed ilua patro esis komercisto. Raymond Barre partoprenis la duesma mondomilito, e de 1946 il rezidis en Francia. Il divenis akademiano pri ekonomiko, ed en 1976 il esis ministro di exterlanda komerco en la guvernerio. En la sama yaro Valéry Giscard d'Estaing selektis ilu kom chefministro e ministro di ekonomiko e financo. Il livis la ministraro di ekonomiko e financo en 1978, ma restis kom chefministro til la vinkeso di Giscard d’Estaing en la prezidantala elekto en 1981. En 1988 il esis kandidato por prezidanto, ma atingis triesma plaso ye la unesma etapo.
25 di aprilo 1874. En Bologna, Italia, Guglielmo Marconi naskis. Ilua Irlandana matro esis nepotino di John Jameson, fondero di wiskio-distilerio. En 1894 il komencis experimentar pri transmisi per elektro-magnetala ondi; tala ondi esabis deskriptata kelka yari antee da Heinrich Rudolf Hertz. Pro manko di intereso di la Italiana ministerio di posto e telegrafo pri plusa explorado di la projeto, Marconi translojis a Britania en 1896 por durigar sua explorado. Ye 12 di decembro 1901 il facis la unesma radio-transmiso trans la Atlantiko, de Cornwall en Anglia a St. John's, Newfoundland e Labrador; la disto esas cirkume 3500km.