Theo van Gogh

De Wikipedio
Irez ad: pilotado, serchez
Theo van Gogh, 2004

Theo van Gogh (Den Haag, 23 julio 1957 til Amsterdam, 2 novembro 2004) esis Nederlandana *rejisero, televizion-programifero, kolumnisto ed opinionifero.

Van Gogh naskis kom filiulo di Johan van Gogh, oficisto dil Internalanda Sekureso-servo (BVD). Patro Van Gogh es nepoto di art-vendisto Theo van Gogh (1857-1890), la fratulo di la piktisto Vincent van Gogh. Van Gogh nomizesis segun onklulo qua mortis dum la Duesma Mondomilito konseque sua aktivesi en la Rezisto. Il edukesis en Wassenaar. La mikra Theo ne volis audar feala rakonti qui finis male. Kom pubero il nokte iris kun amiko ju-vehar per furtit automobili, ed a la tombo di Onklo Theo il ne plu volis. En la gardeno dop la domo il facis paroladi por la populo quan il titulizis “Samlandani!”. Quik pos sua exameno di la sekundara skolo ye 13 mayo 1975 il esis ekpulsita la domo da sua matro, ye joyo di sua fratino. Sua diplomon il queris de sua anciena skolo nur duima yaro ante sua morto. Van Gogh studiis yuri en Amsterdam, kun l’ideo divenar advokato. Pos ruptir sua studiado il anuncis su dufoye che la Nederlandana Film-akademio, ma amba foyi esis refuzata. Il rekoliis kelka pekunio, ed en 1982 il kom autodidakto *rejiso-debutis per la filmo "Luger".

Por "Nekonocata Rendevuo" ("Blind Date") (1996) ed "Por l’intereso di la stato" (“In het belang van de staat”) (1997) il premiizesis per "Gouden Kalf". Por ta lasta filmo Van Gogh ganis en 1999 Atesto di Merito ye l’Internaciona Film-festivalo di San Francisko. Kom aktoro il videblesis en "La Nordani" (“De Noorderlingen”)(1992). Ultre to il anke laboris por la televiziono, ed il skribis provokiva kolumni. Van Gogh esis membro di la Societo Republikana e dum la parlament-elekti en 2003 il votis Ayaan Hirsi Ali. Il sekondis lua kritiko ye l’islamo. Kun Hirsi Ali il produktis la filmo "Submiseso" (brodkastita en la televizion-programo 'Zomergasten'), pri la konekto inter la maniero quale kelki interpretas la korano e mal-traktado di mulieri.

Nula filmo da Van Gogh esis granda suceso en la cinemi. Omna sua filmi komercale deceptis. Sua maxim granda suceso esis "06" quan spektis 30.000 homi. En 1994 ta nombro esis sat multa por esar titulizita ‘maxim sucesoza Nederlandana filmo’, absoluta profundeso-punto en la historio di la Nederlandana film-historio.

Ye mardio-matino la 2ma di novembro 2004 cirkum 9 kloki Van Gogh ocidesis. Il biciklagis tra la Linnaeusstrado en Amsterdam-Oost/Watergraafsmeer, survoye de sua kontoro adheme, kande il esis pafita da altra biciklaganto Mohammed Bouyeri, islamista Nederland-Marokana civitano. Dum ke il ipsa probis shirmar su, ilua korpo frapesis sep foyi da kugli. La 27 yari evanta ocidero seque stekis kultelo en la korpo di Van Gogh por fixigar letro ad Ayaan Hirsi, e seque stekis altra kultelo til la spino aden la torako. Bouyeri quik fugis, ma balde esis kaptita da la polico. Bouyeri deklaris a la polico ke il prefere esus mort-pafita da la polico. Ye 26ma di julio 2005 Bouyeri judiciesis kom kulpanta por l'ocido da la Judicierio en Amsterdam e kondamnesis a vivo-duranta enkarcerigo.