Tietê fluvio

De Wikipedio
Irez ad: pilotado, serchez
Tietê-Paraná baseno.
Plako indikas l'origino di Tietê fluvio

Tietê esas Braziliana fluvio dil stato di Sao Paulo. Ol havas cirkum 1,150 km di totala extenso.

Fluvio originas cirkum 22 km de litoro en municipo di Salesópolis, a un altitudo di 1,120 metri sur mar-nivelo, ma fluas plu kam 1,000 km weste e pos nord-weste til enfluar en Paraná fluvio. Nune ol esas importanta por producajo di hidroelektrala energio en lua 11 hidrobareli, e por fluviala transporto, danko a sistemi di sluzi qua permisas navigar de Paraná fluvio til municipo di Conchas, 155 km nord-weste di Sao Paulo.

Malgre lua ekonomiala importo, fluvio sufras kun intensa poluteso kande krucumas metropolala regiono di Sao Paulo. Tietê e lua enfluanti recevas granda quanto di domestika rezidui, qua provokas intensa malodoro en sika dii, e granda fishi desaparis komplete de ta regiono.

Poluteso en Tietê fluvio, proxim Salto.
Tietê fluvio en Salto.

Poluto fluas de metropolala regiono til proxim Salto, municipo situata 75 km nord-westo di Sao Paulo, ma pos Salto, Tietê recevas granda nombro di enfluanti kun neta aqui. Inter Sao Paulo un hidrobarelo en Santana de Parnaíba e rapidaji ed un aquofalo en Itu e Salto rioxigas lua aqui. Kom rezulto, vivo - specale granda fishi - riaparas pos ta regiono.

Por diminutar la quanto di poluteso en Tietê ed en lua enfluanti, konstruktesas granda instaluri por sanesar aquo en metropolala regiono di Sao Paulo, ma la dato di konkluzo di tota sistemo esas nedefinita.

Altra problemo kauzata da Tietê fluvio esas inundadi qua generale okuras dum someri omna yari. Kom rezulto di desordinata kresko dil metropolo, granda parto di lua rivo en Sao Paulo ed en vicina urbi jacas kovrata da betono ed asfalto, qua ne permisas sulo absorbar l'aquo di pluvi. L'aquo fluas rapide vers Tietê, ed inundas vicina regioni.