Verzuiling

De Wikipedio

Verzuiling ("kolonigo") esas la divido di socio aden grupi sur bazo filozofiala o socio-ekonomiala, tale ke la grupi esas ulgrade shirmata de l'una l'altra.  Ico povas atingesar per fondar institucuri sur bazo filozofiala, quala skoli, klubi, partisi, sindikati, brodkasterii, jurnali e hospitali.  La divido inter ideologii esas vertikala, kontre ke ta inter sociala klasi esas horizontala.  Filozofiala "koloni" do kontenas plura sociala klasi.

La termino unesme uzesis precipue por deskriptar la situeso en Nederlando e Belgia, ma la modelo aplikesas hodie anke a landi quala Nord-Irlando, Suisia, Austria, Chipro, Libano e Malaizia.

Verzuiling eventis unlatere per akuta divido inter la grupi, altralatere per koopero dal eliti supre.  La separeso formacesis per ke singla "kolono" havis sua propra eklezio, brodkasterio, jurnalo, stat-organizuro, sindikato, politikala partiso, dom-asociuro, "scouting"-grupo, skoli, hospitalo, sporto-klubi e mem butiki e komerci.

Ante la mezo dil 20ma yarcento ica situeso esis tante frapanta, ke exemple certena nederlandana butiki preferis employar homi qui esis membro di certena eklezio.  Ico duktis a granda kulturala diferi, ne nur en la urbi, ma anke en la ruro, kun rezulto ke tota grupi vivis apud l'una l'altra sen havar multa kontakto.