Manga

De Wikipedio
(Ridirektita de "Manga")
Figuro en "manga"-stilo

"Manga" (漫画; pronunco: manga), en Ido anke: manga-o, esas la Japonian equivalanto di la rakonto desegnita. “Manga" animacita* nomesas “anime” (アニメ) e precipue en la pasinta duimo di la 20ma yarcento populareskis en l’ocidento. La Koreana versiono di “manga”-arto esas “manhwa” e la Chiniana varianto esas “manhua”.

La maxim granda parto konformas a stilo developit en Japonia ye la fino di la 19ma yarcento, dum ke la formo havas longa prehistorio en l’arto Japoniana antea. En Japonia, la vorto “manga” signifikas rakonto desegnita, irga-qua esez olua origino. En l’ocidento, la vorto “manga” signifikas rakonto desegnita Japoniana, ma anke kelkafoye rakonto desegnita ne-Japoniana respektante la kodexi di populara produktado Japonian o por nomizar, per metonimio, altra produkturi vidala similesanta a certena di ca rakonti desegnita (desegnuri animacita*, stilo grafiala, edc.).

Le “manga” lektesas generale de dextre a sinistre, quale esas la kustumo en Japonia. De origino le "manga" anke lektesis de infre a supre, ma por la merkato exter-Japoniana to ne esas la kazo, nur la lekto de dextre a sinistre. Pro l’alta ritmo di aparo e por limitizar l’imprimo-kusti, la maxim granda parti di le “manga” esas desegnita nigre-blanke, ultre la kovrilo.

La du landi kun la maxim granda nombro de konsumeri di le “manga” esas Japonia e Francia.

Persono desegnanta le “manga” nomizesas “mangaka”. Ca desegnisti en Japonia havas la sama stando kam famoz idolo di pop-muziko en l’ocidento.

Japonia havas multe plusa muliera desegnisti kam Europa od Usa.

Pro ke la Japoniana ne havas pluralo, multa ocidentala fanatiki uzas “manga” anke kom formo plurala. En Ido esas le "manga". Tamen, la formo “manga”-i anke esas uzata.

Etimologio[redaktar | redaktar fonto]

"Manga" signifikas distraktant od amuziv imajaro. Man (漫) signifikas "senskopa" o "distraktanta". Ga (画) signifikas "imajo". La termino "manga" uzesis unesma-foye dal artisto Kacushika Hokusay.

Stilo[redaktar | redaktar fonto]

"Manga"-imaji karakterizas su per personi qui havas granda kapi kun granda rond okuli. Precipue se yuna persono desegnesas: tam plu olda la persono, tam plu mikra esas l'okuli. La korpo havas longa gambi.

Varianto[redaktar | redaktar fonto]

En Japonia esas same populara la "ero-manga" (erotika desegnita rakonti), oli vendesas granda-quantese en supermerkati e kioski, publike inter omna altra libri e desegnita rakonti. En Europa ca varianto nomesas "hentay".