Ambientala efekti de peskado

De Wikipedio
Salti al navigilo Irez a serchilo
Tortugo mortinta acidentale da fish-reto.
Fishi kaptita per fish-reto an la litoro di Chili.

L'ambientala efekti de peskado inkluzas problemi relate disponebleso di fishi, ecesiva peskado, e l'impakti di pesko-explotado e pesko-industrio sur l'ambiento, exemple la morto di altra speci qui ne uzesas dal industrio o por homala konsumo dum pesko-agadi.

Pro ke la demando di marala resursi ja proximeskis al limiti pri produktado, multa marala resursi subisas domaji. La tropeskado minacas multa aquala speci, samatempe kam altra homala agadi anke minacas la vivo aquala, exemple, per polutado industriala o hemala, o kontamino per pest-ocidili uzata en agrokultivo. Ca impakti afektas komercala peskado, ma anke l'agadi koncerne libera tempo, e turismo.

La problemi pri ambientala konservado di la mari, fluvii e lagi studiesas da tale-nomizita pesko-cienco. Segun raporto da FAO (l'Organizuro pri Nutrivi ed Agrokultivo dil Unionita Nacioni), la totala produkturo di fishi, krustacei, moluski ed altra aquala animali duris kreskar, ed atingis 172,6 milion tuni en 2017, kreskinte 4,1 procenti kompare a 2016. La disto inter la provizuro di fishi e la demando mondala duras kreskar, parte pro la kresko di la mondala habitantaro.

Same kam pri altra ambientala problemi, povas aparar konflikti, exemple, inter peskisti - qui dependas de peskado kom vivo-moyeno - , e pesko-ciencisti, qui montras la neceseso di diminutar la troexploto di marala resursi por prezervar aquala vivo.