Art Nouveau

De Wikipedio
(Ridirektita de Art nouveau)
Irez ad: pilotado, serchez
Pikturo, objekti, konstrukturi e mozaiko en stilo Art Nouveau.

Art Nouveau esas artala ed arkitekturala stilo qua divenis populara de la yaro 1890 til cirkume 1914. La stilo inspiresis en la kurva linei de la naturo, note la kurva linei de la planti e flori. Ol anke influis la vestaro, grafik arto, juvelaro, menajala utensili, moblaro e la bel arti.

L'Angla e la Portugalana lingui, du exempli inter altri, ank uzas Franca frazo Art Nouveau (uzata en Francia e Belgia) precipue por referar l'arkitekturo, la skulturo, la moblaro e l'afishi koloroza kun linei kurva de ta epoko. Ca artala movado nominesas Modernismo en la Hispana, Modernisme en Kataluniana, Jugendstil en Germania, Secessionsstil en Austria-Hungaria, Szecesszió en la Hungara, ed altra nomi.

Dum la yari 1910ma la movado Art Nouveau ja konsiderabis ekmoda en Europa. Ol remplasesis per la stilo Art déco e pose per Modernismo.

L'origino di la frazo Art Nouveau esis l'artala galerio Maison de l'Art Nouveau ("domo di la Nov Arto") apertita en 1895 dal Germana komercisto di arto Siegfried Bing, qua traktis la nova stilo. En Francia, anke uzesis l'Angla frazo "Modern Style", o la frazi Style moderne, Style 1900 por la stilo Art Nouveau.[1] Ol anke konocesis per la frazi Style Jules Verne, Le Style Métro (pro la stacioni dil metropoliteno* di Paris dekoresis en ca stilo), Art Belle Époque, ed Art fin de siècle.[2]

En Usa, pro asociesir al artisto Louis Comfort Tiffany ol ofte nominesas Tiffany Style,[1] dun ke en Germania e Skandinavia ol nominesas Jugendstil pro la populara Germana revuo pri arto del epoko.[1] Kelka frazi referas precize a la kurvoza formi, populara en Art Nouveau, quale Stile Floreal (floroza stilo), Paling Stijl ("anguiloza stilo") en Nederlando, e Wellenstil (ondoza stilo) o Lilienstil (lilioza stilo) en Germania.[1]

Referi[redaktar | redaktar fonto]

  1. 1,0 1,1 1,2 1,3 Duncan, Alastair, Art Nouveau, serio di libri "World of Art", editerio "Thames and Hudson", New York, publikigita la yaro 1994. ISBN 0-500-20273-7
  2. Cybele Gontar (oktobro 2006). Art Nouveau. "Heilbrunn Timeline of Art History".