Balona expediciono al Arktiko di 1897

De Wikipedio
S. A. Andrée e Knut Frænkel kun la balono falegita sur mara glacio, fotografita da la triesma membro, Nils Strindberg. La filmo di ca fotografuro ed altri de la sensucesa expediciono rekuperesis en 1930.

La Balona expediciono al Arktiko di 1897 da S. A. Andrée esis sensucesa probo pri irar a la Norda Polo en qua omna tri expedicion-membri mortis. S. A. Andrée (1854–97), l'unesma balonisto de Suedia, propozis voyajo per hidrogeno-balono de Svalbard a Rusia o Kanada, qua irus, kun fortuno, sur la Norda Polo dum la mezo di la voyajo. La ideo recevesis kun entusmiasmo nacionala en Suedia, norda lando qua esis dop la altri en la konkurenco a la Norda Polo.

Andrée ignoris multa signi pri la danjeroza aspekto di lua projeto. Por sekura voyajo bezonesis efikiva sistemo por tornar la balono, ma fakte existis multa signi ke la kordo-tekniko por tornar la balono quan ilu inventabis esis ne-efikiva. Tamen, lu riskis la fato di la expediciono a la kordi. Plu male, la polala balono Eagle sendesis direte a Svalbard de la fabrikisto en Paris sen investigar lua sekureso; kande mezuri montris ke ol likis plu multe kam pensita, Andrée refuzis egardar la fakto. La maxim multa moderna studenti judikas ke l'ecesiva optimismo di Andrée, lua kredo en la povo di teknologio, e lua ignoro di la povo di naturo esis la precipua kauzi qui igis la morto di ilu e lua du akompaninti Nils Strindberg (1872 – 97) e Knut Frænkel (1870–97).

S. A. Andrée (1854–97).

Pos ke Andrée, Strindberg, e Frænkel komencis la voyajo de Svalbard en julio 1897, la balono rapide perdis hidrogeno e falegis sur la mar-glacio pos nur du dii. La exploristi ne vundesis ma havis desfacila voyajo sude tra la chanjanta glacio. Sen sat multa vestaji e preparaji, e shokigita per la desfacileso di la lando, li ne retrovenis. Kande la Arktikala vintro venis a li, la grupo divenis exhaustata en la Kvitøya (blanka insulo) insulo e mortis ibe. Dum 33 yari la fato di la expediciono duris kom un ek la ne-solvita kozi en la Arktiko. La deskovro acidentala en 1930 di la lasta kampo di la expediciono divenis granda novajo en Suedia, kande la mortinta viri lamentesis ed idoligesis. La morto di la tri pensesis en multa manieri en Suedia, ed en multa verki pos la deskovro Andrée aparis de nacionala heroo, a mala viro qua sakrifikis sua akompaninti por ambicio.

Extera ligili[redaktar | redaktar fonto]