California Dreamin'

De Wikipedio
Disko di "California Dreamin'" de 1969

"California Dreamin'" esas kansono skribita da John Edmund Phillips e Michelle Phillips, ed unesme enrejistrita da Barry McGuire.

The Mamas and the Papas

Tamen, la maxim bone konocata versiono esas ta da The Mamas & the Papas, qui kantis en la originala versiono, ed ipsa editis ol kom disko en 1965.

La kansono esas 89ma en la listo di la 500 Maxim Bona Kansoni di Omna Tempo da Rolling Stone. La liriki di la kansono expresas la dezirego dil naracanto a la varmeso di Los Angeles dum kolda vintro en New York-urbo.

La kansono divenis simbolo di la Kalifornia-Mito e la arivo di la naskanta kontrekulturo-epoko.

"California Dreamin' " certifikesis kom Ora Disko da la RIAA en junio 1966 ed instalesis en la Grammy Hall of Fame en 2001.

Historio[redaktar | redaktar fonto]

La kansono skribesis en 1963 dum ke John Phillips e Michelle Phillips habitis New York. John prisonjis la kansono e vekigis elu por helpar il skribar ol. Tatempe, John e Michelle Phillips esis membri di folk-grupo "The New Journeymen", quo evolucionis aden The Mamas & the Papas. Anke Nancy Sinatra enrejistris versiono dil kansono.

Li obtenis sua unesma disko-kontrato pos introduktesar a Lou Adler, la chefo di Dunhill Records, da Barry McGuire. Por dankar Adler, li kantis ye "California Dreamin'" kun membri dil grupo The Wrecking Crew ye la albumo da McGuire This Precious Time. The Mamas & the Papas lore enrejistris sua propra versiono uzinte la sama instrumentala e vocala strati, a qui li adjuntis nova kanti kun alto-fluto-solo da Bud Shank. P. F. Sloan pleis la gitar-introdukto.

La disketo editesis en tarda 1965 ma ne quik sucesis. Pos ganar poka atenco en Los Angeles lor editeso, Michelle Phillips rimemoras ke radio-staciono en Boston popularigis la kansono trans la lando. Pos atingar la rangi en januaro 1966, la kansono atingis numero 4 en marto che la Billboard Hot 100, restinte ibe dum 17 semani. "California Dreamin'" esis disko numero 1 di 1966 che Billboard. Ol anke atingis numero 23 en la britana rangi.

Altra versioni[redaktar | redaktar fonto]

Artisti qui enrejistris ica kansono inkluzas The Faction, R.E.M., The Beach Boys, America, Wes Montgomery, Gary Hoey, Dead Artist Syndrome, José Feliciano, The Carpenters, Baby Huey & the Babysitters, le Four Tops, Melanie, Bobby Womack, Queen Latifah, The Seekers, George Benson, Hugh Masekela, Eddie Hazel, Raquel Welch, Benn Jordan, Wilson Phillips, Diana Krall, Lee Moses, Dik Dik, e John Phillips sen The Mamas & the Papas.