Demografiala konto

Demografiala piramido di Usa (distributo di habitanti segun evo) segun konto 2015.

Quanto di habitanti di Usa de 1790 til 2010, obtenita de serio di kontadi.

Demografiala konto esas la procedo di enrejistro e kalkulo di informi pri la tota habitantaro di ula lando, e lua distributeso tra la teritorio, lua distributeso segun evo, sexuo, revenuo, edc. La skopo di demografiala konti esas obtenar informi pri la tota habitantaro di ula lando, por pose uzar en projeti di politiki sociala, establisar la quanto di reprezentanti elektebla po regioni, edc.

Demografiala konto facesas de multa tempo, exemple dum Akemedida imperio en Persia, en antiqua Egiptia, en Biblial Israel, en kelka urbi di antiqua Grekia, en antiqua Roma, en Chinia e mem dum Inkao imperio. De la fino di la 19ma yarcento til nun, la maxim multa landi facas periodala konti, ordinare ye singla 10 yari, ma altri mem ye singla 5 yari. Nun, la skopo di demografiala konto esas obtenar serio di informi qui posibligos produktar demografiala ed ekonomiala statistiki, exemple savar la demografiala kresko di tota regioni de la lando, la quanto di personi habila por votar, la quanto di personi qui povas pagar imposti, la quanto di infanti qui ne studias en skoli, la quanto di adulti qui ne savas lektar e skribar, la quanto di individui evoza, edc.