Estuary English
Estuary English ("Estuario-Angla") esas angla dialekto od achento asociata kun sudest-Anglia, aparte la areo alonge la Fluvio Thames e lua estuario, en la regiono cirkum London.
Fonetikisto John C. Wells propozis defino di Estuary English kom "Normala Angla parolata kun la achento di sud-est Anglia", ma il kritikis la ideo ke la difuzeso di linguo de London a la sudesto esas ulo nova. La nomo venas del areo cirkum la Thames, precipue lua estuario. On povas audar Estuary English en London, norda Surrey, norda Kent, suda Hertfordshire ed Essex. Estuary English havas multa traiti komuna kun la achento Cockney, ed esas debato inter linguisti pri ube Cockney finas ed Estuary English komencas.
La dialekto unesme divenis konocata per artiklo da David Rosewarne en la Times Educational Supplement en oktobro 1984. Rosewarne argumentis ke ol forsan uldie remplasos Received Pronunciation (RP) en sudesta Anglia. Studii indikis ke Estuary English ne esas unika koheranta formo dil angla; kontree, ol konsistas ek ula (ma ne omna) fonetikala traiti dil dialekto di la laboristala klasi di London difuzesanta diversa-rapidese sociale aden meza-klasa dialekti, e geografiale aden altra achenti di sudesta Anglia.
Estuary English ofte trovesas cirkum suda e sudesta Anglia, aparte che la yuni. Multa homi konsideras ol kom laborista-klasa achento, ma ol ofte parolesas anke dal basa-meza klasi. En la debato cirkum artiklo di 1993 pri Estuary English, Londonana komercisto asertis ke Received Pronunciation perceptesis kom neamikala, do Estuary English preferesis por komercala skopi.
Ula homi adoptas la achento kom moyeno di "integresko", por semblar plu laborista-klasa, o plu "ordinara" – kelkafoye ica afektaco mokeme referesas kom "Mockney". Formovo de tradicionala RP-achenti esas quaze universala che meza-klasa yuni.