Fela Kuti
Fela Anikulapo Kuti, nasko-nomo Olufela Olusegun Oludotun Ransome-Kuti (Abeokuta, la 15ma di oktobro 1938 - m. Lagos, la 2ma di agosto 1997 esis Nigeriana muzikisto e politikal aktivisto. Il developis propra muzik-stilo, olqua il nomizis afrobit.
Fela Kuti naskis en protestanta familio de Yoruba-tribuo, ilua patro esis pastoro, ilua matro esis docisto ma divenis tre importanta politikisto.
Dum ilua voyaji kun sua bando Fela Ransome-Kuti ad Usa il impresesis dal aktivismo di Malcolm X ed influesis da ilua idei ed altra negro-aktivisti.
Retroe en Nigeria il difuzis sua politikal idei per la muziko ed ilua nokto-klubo Afro-Shine. La muziko da Fela Kuti divenis tre popular en Nigeria ed altra Afrikana landi. Il proklamis sua propra domo, quan il cirkondigis per fenco, a nedependanta Republiko Kalakuta.
Dum Festo por Negro-arti e Kulturo en Lagos (1978), il pleis la kansono Zombie, kansono qua mokis la povo dil armeo en Nigeria. La kansono esis grandega suceso en Nigeria e granda parti di Afrika. L'armeo di Nigeria demolisis ilua domo e kruele tormentis olua habitanti[1]. La matro di Kuti mortis pro la vunduri dal inkurso.
Un yaro pose Kuti mariajesis su un-stroke a 27 mulieri, dansisti e duesma voci de ilua bando. Pos la mariajo Kuti e sua bando de 60 membri pleis en stadio en Accra (Ghana). Dum plear Zombie sedicii eruptis e la bando ekpulsesis la lando.
Kuti kandidatigis su du foyi (1979 e 1983) por prezidantal elekti, ma impedesis da politikala povi.
20 Monati pos enkarcerigeso en 1984 da la rejimo di Muhamadu Buhari (pro 'nelegal exporto di pekunio') e liberigo da Ibrahim Babangida, Kuti plugrandigis sua bando a 80 membri e nomizis ol "Egypt 80" kun qua il pleis en Europa, Afrika ed Usa.
En 1997 Fela Kuti mortis pro sida. Ilua funero asistesis da milion de admiranti.