Fluvio Tietê

De Wikipedio
Salti al navigilo Salti al serĉilo
Baseno di Tietê e Paraná.
Plako indikas l'origino di fluvio Tietê

Tietê esas Braziliana fluvio dil stato Sao Paulo. Ol esas longa de cirkume 1 150 km.

La fluvio naskas ye cirkume 22 km del litoro an la municipo Salesópolis, ye altitudo di 1,120 metri super la marala nivelo ma fluas plu kam 1,000 km weste e pose nord-weste til enfluar an la fluvio Paraná. Nune ol esas importanta por produktado di hidroelektrala energio en lua 11 aquobarili, e por fluviala transporto, danke sistemi di sluzi qui posibligas la navigo de fluvio Paraná til municipo Conchas, ye 155 km nord-weste di Sao Paulo.

Malgre lua ekonomiala importo, la fluvio subisas intensa poluteso kande ol krucumas la metropolala regiono di Sao Paulo. Tietê e lua enfluanti recevas granda quanto de domala rezidui, qui produktas intensa malodoro dum sika dii, e la granda fishi tote desaparis de ta regiono.

Poluteso di fluvio Tietê, proxim Salto.
Fluvio Tietê an Salto.

La polutajo fluas del metropolala regiono til proxim Salto, municipo situata ye 75 km nord-weste di Sao Paulo, ma trans Salto Tietê recevas multa enfluanti kun neta aqui. Advale dil urbo Sao Paulo, l'aquobarilo Edgard de Souza en Santana de Parnaíba retenas parto dil polutajo, qua lore sedimentifas sur la fundo (ol retenas mem la spumo di detersivi, quo produktas depresiva spektajo, kande la vento levas e portas floki ek fetida spumo del aquo-surfaco) e la rapidaji ed aquofalo inter la urbi Itu e Salto ebuliigas e rioxigenizas la fluvial aquo. Konseque, vivanti - precipue granda fishi - riaparas advale di ta regiono.

Por diminutar la poluteso di Tietê e di lua enfluanti, on konstruktas granda instaluri por salubrigar l'aquo en la metropolala regiono di Sao Paulo, ma la dato por parkonstrukto dil tota sistemo ne ja esas determinita.

Altra problemo produktata da fluvio Tietê esas la inundadi, qui ordinare eventas dum someri omnayare. Konseque de desordinita kresko di la metropolo, granda parto di lua valo en Sao Paulo ed en vicina urbi kovresas da betono ed asfalto, qui ne lasas la sulo absorbar pluvuro. L'aquo fluas rapide vers Tietê ed inundas tereni an lua rivi.