Germani de Karpati

Jurnalo *Pressburger Zeitung*, imprimita en 1869 che urbo Pressburg, nun Bratislava, Slovakia.

Germani de Karpati (Germane: Karpatendeutsche, Hungare: kárpátnémetek, Felvidéki németek, Slovakiane: karpatskí Nemci) esas grupo di parolanti di Germana linguo de Central Europa. La termino kreesis da Germana historiisto Raimund Friederich Kaindl (1866-1930) por nomar Germane-parolanta habitanti di regioni cirkum Karpati en Austria-Hungaria, la nordo di Rumania (Maramureș) e Rutenia, en la nuna Ukraina. Nun, ta termino uzesas nur por habitanti Germane-parolanta di Slovakia e Rutenia.

Historio

Germani establisis su en nordala teritorio di Rejio Hungaria (teritorio qua nun apartenas a Slovakia) de la 12ma til la 15ma yarcento, nome pos l'invado da Mongoli en 1241. Probable ante existis kelka izolita koloniani en Pressburg (nun Bratislava). Germani ordinare laboris kom mestieristi o komercisti. Til cirkume la 15ma yarcento, l'administreri dil urbi en la regiono esis preske exkluzive Germani.

Dum la 19ma yarcento, quale ank eventis kun Slovaki, Germana populi qui habitis la nuna Hungaria koaktesis adoptar Hungara linguo e chanjar lia surnomi a Hungara surnomi por acensar ekonomiale e sociale. Ye la 28ma di oktobro 1918, kelka Germani qui habitis Késmárk (nun Kežmarok, Slovakia) deklaris loyaleso a Hungaria, kontre ke altri deklaris loyaleso a Chekoslovakia du dii pose.