Historio di Grenada

De Wikipedio
Jump to navigation Jump to search

L'insulo Grenada formacesis cirkume 2 milion yari ante nun per volkanal aktiveso. Ol deskovresis en 1493 da Cristoforo Colombo, qua nomizis ol segun Hispanian urbo Granada. Kande il arivis en l'insulo, Karibi indijeni vivis en ol, e nomizis l'insulo "Camahogne". Hispani ed Angli faliis pri konquestar l'insulo, ma en 1650 Franci konquestis ol sucese. Franca konquesto rezultis en gentocido dil indijeni Karibi.

Franci kaptas Grenada, en julio 1779.

Franci prenis kontrolo dil insulo e nomizis ol "La Grenade". Lua precipua exportacajo esis sukrokano. En 1763 l'insulo cedesis a Britania, ma dum l'Usana nedependo-milito Francia itere kaptis l'insulo, en julio 1779. Depos 1783 kun la kontrato di Versailles, l'insuli retrodonesis a Britaniani. En 1834 Britaniani abolisis sklaveso.

Flago di Grenada.

Lando divenis nedependanta de Unionita Rejio ye la 2ma di februaro 1974. Eric Gairy divenis lua unesma chefministro. Balde komencis konflikti inter Gairy e la partisi qui opozis il, specale la partiso "New Jewel Movement" (NJM). En 1976 la partiso di Gairy itere ganis l'elekto, ma lua opozinti konsideris fraudoza la vinko. En 1979 la "New Jewel Movement" sub la chefeso di Maurice Bishop donis stato-stroko e revokis Gairy. La konstituco suspensesis e la partiso di Bishop "People's Revolutionary Government" komencis guvernar per dekreti.