Historio di Republiko Macedonia

De Wikipedio
Irez ad: pilotado, serchez
Anciena tribui en la regiono.

Dum l'Antiqueso granda parto di la teritorio di nuna Republiko Macedonia esis parto di la rejio di Peonia, populo qua originis de Trakia[1], ma anke de Iliria e Dardania. En 336 aK Filip 2ma konquestis Supra Macedonia, inkluzite la regiono di nuna Republiko Macedonia[2]. Lua filiulo, Alexandros la Magna konquestis la cetera regiono.

La Mediteraneo en 168 aK pos la batalio di Pydna

Ye la 22ma di junio 168 aK eventis la batalio di Pydna, en nuna Grekia, inter Roma e Macedonia; Roma vinkis, quo signifikis la finala destrukto di la antea imperio di Alexandros la Magna.

Kelka yari ante, Romani sucese atakis Macedonia, di qua la regnanto tatempe esis Filipus la 5ma; pos la batalio di Cynoscephalae en 197 aK Philippos perdis sua teritorii, ecepte Macedonia ipsa. L'imperio Seleucida pose invadis ca regiono del esto ma ekpulsesis dal Romani, qua pose extensis lua imperio este. Perseus, filiulo di Filipus la 5ma, esforcis por rivivigar la povo di Macedonia, quo finis ye la batalio di Pydna.

Romana komandinto Lucius Aemilius Paullus, vinkoza ye la batalio, enkarcerigis Perseus, ed imperis la ocido di kinacent eminenta Macedoniani qui opozis Roma.

Dum la Mezepoko la regiono subisis influi de Bizancana Imperio e de slavi. Dum la 10ma yarcento la regiono divenis la centro di l'Unesma Bulgarian imperio, sub la guvernerio di caro Samuil la 1ma. Nova chef-urbo establisesis en Ohrid.

Dum l'unesma duimo di la 15ma yarcento Otomani konquestis la regiono, qua divenis parto di Otoman imperio dum preske 500 yari. Dum Otomana dominacajo, la regiono koloniigesis da Turki, qui divenis signifikanta minoritato. Dum l'Otomana administrado, Skopje e Monastir (nune Bitola) divenis chef-urbi di separita regioni.

Serbia kaptis la regiono dum l'unesma Balkana milito en 1912. Dum Serbiana guvernerio, la regiono ne havis autonomio. Pos l'unesma mondomilito Serbia divenis parto di Rejio di Serbi, Kroati e Sloveni. En 1929 la rejio rinomizesis Rejio di Yugoslavia.

Arkivo:Liberation of Skopje.jpg
La habitanti di Skopje salutas Metodija Andonov-Čento, pos lua trupi liberigar la regiono en 1944.

Dum la duesma mondomilito trupi de l'Axo okupis la regiono, qua dividesis inter Bulgaria ed Italian okupita Albania. Bulgarian autoritati, sub Germana preso, deportis plu kam 7,000 judi de Skopje e Bitola. Macedona komunisti organizis partizana movado ed ekpulsis Germana trupi de la regiono til la fino di 1944. En la fino di ta yaro, la Anti-Fashist Asemblajo por la Nacionala Liberigo di Macedonia proklamis la Populala Republiko di Macedonia, un di la sis republiki di Yugoslavia.

Pos plebicito, Republiko Macedonia divenis nedependanta de Yugoslavia ye la 8ma di septembro 1991. Lando ne subisis interna milito pos nedependo, kontraste kun l'altra ex-Yugoslaviana republiki.

Inter februaro e agosto 2001 eventis revolto di Albani en la nordo ed en la westo di la lando. La milito finis pos l'interveno di NATO. Segun la pakto di Ohrid, Albani mustus abandonar l'ideo pri nedependo di la regiono e la guvernerio mustus augmentar politikala povo dil Albana minoritato.

Referi[redaktar | redaktar fonto]

  1. Bauer, Susan Wise: The History of the Ancient World: From the Earliest Accounts to the Fall of Rome (2007), ISBN 0-393-05974-X, page 518: "... Italy); to the north, Thracian tribes known collectively as the Paeonians."
  2. [http://books.google.com/books?id=ppbuavUZKEwC&pg=PA187&dq=dardania+today+republic+of+macedonia&lr=&hl=bg#PPA14,M1 Who are the Macedonians? C. Hurst & Co. Publishers, 2000, ISBN 1-85065-534-0, p. 14


LocationEurope.png
Historio di Europa
Albania | Andora | Austria | Belgia | Bielorusia | Bosnia e Herzegovina | Bulgaria | Chekia | Dania | Estonia | Finlando | Francia | Germania | Grekia | Gruzia | Hispania | Hungaria | Irlando | Islando | Italia | Kroatia | Latvia | Liechtenstein | Lituania | Luxemburgia | Macedonia | Malta | Moldova | Monako | Montenegro | Nederlando | Norvegia | Polonia | Portugal | Rumania | Rusia | San Marino | Serbia | Slovakia | Slovenia | Suedia | Suisia | Ukraina | Unionita Rejio | Vatikano