Horace Andy

Horace Andy (2013)

Horace Hinds, konocata per ilua nomo di artisto Horace Andy (pron.: hores-endi; n. Kingston la 19ma di februaro 1951), esas Jamaikana regey-kantisto e produktisto.

Horace Hinds registragis en 1967 sua unesma singlajo "This is a Black Man's Country", qua ne esis suceso. Ye konsilo da Coxson Dodd, proprietanto di la muzik-registrageyo, il chanjis sua nomo a Horace Andy. Ilua tra-rupto esis 1970 per la kansoni "See a Man's Face", "Night Owl", "Fever" e "Mr. Bassie". La disko "Skylarking" divenis un de ilua maxim bone konocata diski.

Dum la yari 70 il havis multa suceso en Jamaika ube il laboris interaltre kun Bunny Lee. Il translojis ad Usa en 1977, ube il pleis rolo en la developo di dansohalo, la plu komercala versiono di regey-muziko. En 1990 il kunlaboris la Britaniana bando Massive Attack, e produktis nova solo-albumi en 1999 e 2002.