Inaluk Arsanukayev

De Wikipedio

Inaluk Arsanukayev, konocita kom knyazo Dishninski esis Chechena chef-ministro di Emirio di Nordal-Kaukazia.

Il devenis de Chechena vilajo Eziho, qua nuntempe jacas en distrikto Itum-Kali. Ye tempi di cariala Rusia esis chefo di lokala polico en desgranda vilajo. Ilua unesma spozino Padam esis filiino di Ahmed Tolgayev, e dum mariajo esis nur 14-yara. Lore Arsanukayev esis ankore kadeto di militala skolo. Pos parfino sua lerneyo la paro iris ad Yerevan, ube il laboris kom impostokolektisto. Ibe Padam naskigis jemeli, qua balde mortis. Pos tri yari en Yerevan Arsanukayev komencis laborar en Tbilisi, e ilua spozino kun nov-naskita filiino Habira rivenis ad parenti di Inaluk en Chechenia. Tempala separo esis mult-yara – Arsanukayev laboris en Tbilisi 10 yari.

Inaluk Arsanukayev falsigis sua deveno e ludante aristokrato spozinigis Gruza knyazino Yekaterina Sumbatova (Sumbatoshvili). Sustraktinte la titulo il divenis knyazo Dishninski. Balde vera deveno dil spozulo ne esis ja sekreto, quo duktis ad ilua duelo kontre un ek fratuli di Yekaterina. Il venkis e refuzis mortigar rivalo. Pro to familio di ilua spozino pardonis trompo ad il. Duesma spozino di Arsanukayev naskigis en Tbilisi filiino Lyalya (Lamara).

Ye 1919 Chechena knyazo Dishninski parvenis ad rebeli di Uzun-Hadji batalinta kontre Blanki (kontre ex-cariala generalo Anton Denikin). Il adportis letro de sultano Mehmed la 6ma Vahidettin. Ye la 22ma di septembro 1919 Arsanukayev anoncesis da Uzun-Hadji kom granda viziro e chef-ministro di nov-kreita stato Emirio di Nordal-Kaukazia.