Jörg Meuthen

Jörg Hubert Meuthen
Profesiono:	Politikisto
Lando:	Germania
Naskodato:	29 di junio 1961
Nasko-loko:	Essen, Germania.
Mortodato:
Retoloko:	http://meuthen.afd-fraktion-bw.de/

Jörg Hubert Meuthen (n. ye la 29ma di junio 1961 en Essen) esas politikisto di Germania. Depos julio 2015 il esas un del du prezidanti di la dextra partiso Alternativo por Germania.

Personala e profesionala vivo

Jörg Meuthen studiis ekonomio en Münster e Mainz. Il recevis la grado di doktoro ye la yaro 1989 en Köln. Pose Meuthen laboris en la ministerio de financii di la germana federala lando Hesia. Ye la yaro il laboreskis kom docento e profesoro por publika administrado ye la universitato di Kehl.

Jörg Meuthen esas mariajata por la duesma foyo. Ek sua unesma mariajo il havas tri infanti. Ye la yaro 2018 il mariajis su kun Natalia Zvekic (n. ye la yaro 1982), elqua havas kin infanti ek sua unesma mariajo.

Politikala kariero

• 2013 Jörg Meuthen divenis membro dil dextra partiso Alternativo por Germania e vice-prezidanto dil partiso en la federala lando Badenia-Wurtemberg.
• 2014 Meuthen kandidatesis sur la listo dil Alternativo por Germania por la Europana Parlamento, ma ne elektesis.
• 2015 Jörg Meuthen elektesis ye la 4ma di julio 2015 en Essen kom un del du prezidanti dil partiso Alternativo por Germania ed il divenis un de la tri prezidanti dil partiso en Badenia-Wurtemberg.
• 2015-2017 Membro dil parlamento dil federala lando Badenia-Wurtemberg.
• 2017 Meuthen elektesis kom membro dil Europana Parlamento por la partiso Alternativo por Germania.

Politiko

Jörg Meuthen esas la chef-reprezentanto dil moderema-konservema parto di sua dextra partiso Alternativo por Germania.