Jesse Jackson
Jesse Louis Jackson sr. (pron.: jesi-jekson; nasko-nomo Jesse Louis Burns; n. Greenville, 8ma di oktobro 1941 – m. Chicago, 17ma di februaro 2026), esis Usana baptisto-predikanto, politikisto ed aktivisto por civila yuri.
Jackson esis direta kunlaboranto di Martin Luther King e pos la morto di King divenis la maxim importanta duktero di la negro-komuneso en Usa. En la yari 80 il probis kandidatigar su dufoye por prezidanto por la Demokrata Partiso.
Il renkontris sua spozo Jacqueline Lavinia Brown dum la studio en l'universitato e mariajesis ad el en 1962. Dum ilua studenteso il partoprenis lokala manifesti kontre segregaco e por civila yuri. En 1965 il partoprenis senviolenta manifesti por yuri por afrikan-usani, kunorganizita da Martin Luther King, e komencis laborar por King.
En 1968 Jackson divenis baptisto-predikanto. La 4ma di aprilo 1968 King pafesis a morto koram Jackson, to quo enorme shokigis lu. Jackson sucedis King ma balde disputis kun Ralph Abernathy e perdis direktisteso pri Operation Breadbasket (1971), l'ekonomiala departmento di Southern Christian Leadership Conference (SCLC), di qua King igis lu direktisto. Il fondis nova organizuro PUSH (People United to Save Humanity, homi unionita por salvar la homaro) por implikigar afrikan-usani pri ekonomio. Il anke divenis prezidanto di Rainbow Coalition (cielarko-koalisuro) qua aspiris egala yuri por afrikan-usani, mulieri e homeosexuali.
L'elekto di Barack Obama kom l'unesma negro-prezidanto en 2008 emocigis Jackson, il publike ploris pro joyo: "Me joyas ke me vivis suficante longe por experiencar ke nia laboro havis rezulto"[1][2].