Karl Heinrich Ulrichs

Karl Heinrich Ulrichs (n. Westerfeld, Aurich (Est-Frizia, Germania), la 28ma di agosto 1825 – L'Aquila (Italia), la 14ma di julio 1895) esis un del unesma lukteri di homeosexual-emancipo. Il studiis teologio e yuri en l'universitato di Göttingen, e pose historio en l'universitato di Berlin. Il promocesis per tezo en la Latina pri la Paco di Westfalia.

Ulrichs inventis la vorto "uranismo" por homeosexualeso, viro amoranta viro nomesis "urning" e muliero amoranta muliero esis "urninde". Il pledis por homeosexuala mariajo. Il anke konsideresas un del unesma viri qui publike esis homeosexuala.

En 1867 il diskursis pri ca temo dum kongreso di yuristi en München, ma interruptesis da lauta protesti. Deceptite il retretis en exilo en Italia, ube il restis til sua morto.