La Lasta Judiko (Michelangelo)

De Wikipedio
La Lasta Judiko

La Lasta Judiko (italianaIl Giudizio Universale) esas fresko dal italiana Renesanco-piktisto Michelangelo, qua kovras la tota altaro-muro di la Kapelo Sistina en Vatikano.

Ol reprezentas la Duesma Veno di Kristo e la finala ed eterna judiko da Deo di la tota homaro.  La anmi di homi acensas e decensas a lia fati, segun la judiko da Kristo, qua cirkondesas da eminenta santi.  Entote esas plu kam 300 figuri, preske omna maskuli ed anjeli originale montrita kom nudi; multa pose mi-kovresis per piktita drapiraji, de qui uli restas pos recenta netigo e restauro.

Kompletigo dil verko bezonis plu kam quar yari inter 1536 e 1541 (preparo dil altaro-muro komencis en 1535).  Michelangelo laboreskis pri ol duadek-e-kin yari pos ke il finabis la Plafono di la Kapelo Sistina, ed evis preske 67 lor olua kompletigo.  Michelangelo originale aceptis la komiso de Papo Klemens VII, ma ol kompletigesis sub Papo Paulus III, di qua la forta reformemeso probable influis la finala trakto.

En la basa parto di la fresko, Michelangelo sequis tradiciono per montrar la salviti acensanta sinistre, e la damniti decensanta dextre.  En la supra parto, la habitanti di Cielo bonvenigas le jus salvita.  La fresko esas plu monokroma kam la plafono-freski, e dominacesas da toni di karno e cielo.  Netigo e restauro di la fresko, tamen, revelis plu granda kolorala gamo.  Oranjea, verda, flava e blua esas difuzita omnaparte, animanta ed uniganta la komplexa ceno.

Acepto di la pikturo esis pasabla de-komence, kun multa laudo, ma anke kritiko pro motivi religiala ed artala.  La quanto de nudeso, la muskuloza stilo di la korpi, e la tota kompozuro omna disputesis.