Mondo 2000

Mondo 2000 esis ciberkulturo-revuo editita en Kalifornia, Usa dum la 1980a e 1990a yari.

En ol esis lektebla artikli pri "cyberpunk"-temi quala virtuala realeso ed inteligenta ("smart"-)drogi.  Ol esis plu anarkiala e subversiva prototipo por la plu tarda revuo Wired.

Mondo 2000 unesme editesis kom High Frontiers en 1984, redaktita da R. U. Sirius (pseudonimo di Ken Goffman) kun kunredaktero ed editero Morgan Russell.  R. U. Sirius sucedesis kom chef-redaktero da Alison Bailey Kennedy, a.k.k. "Queen Mu" od "Alison Wonderland".

Sirius akompanesis da la "hacker" Jude Milhon (a.k.k. St. Jude) kom redaktero e la revuo rinomizesis Reality Hackers en 1988, por plu bone reflektar olua temi, drogi e komputori.  La titulo chanjesis itere a Mondo 2000 en 1989.  L'arto-direktisto e fotografero Bart Nagel, pioniro di Photoshop, kreis la elegante surealista estetiko dil revuo.

R. U. Sirius livis ye la komenco di 1993, cirkume samtempe kam la lanseso dil revuo Wired.  La revuo Mondo 2000 duris til 1998, e la lasta numero esis numero 17.

Kun la imprimita versiono di Boing Boing - kun qua Mondo 2000 havis plura komuna skriberi, inkluze Mark Frauenfelder, Richard Kadrey, Gareth Branwyn, e Jon Lebkowsky - Mondo 2000 helpis developar la "cyberpunk"-subkulturo.  Skriberi inkluzis William Gibson, Nan C. Druid (pseudonimo di Maerian Morris), Paco Nathan, Rudy Rucker, Bruce Sterling, Tiffany Lee Brown, Andrew Hultkrans, Mark Dery, Douglas Rushkoff, Mark Pesce, e Robert Anton Wilson.

La revuo Mondo 2000 rilansesis per enreta formato, sen imprimita versiono, en agosto 2017.