Musiktheater im Revier
Musiktheater im Revier (MiR) esas teatro por opero, opereto, muzikala teatraji e baleto en Gelsenkirchen, Germania.
Ol apertesis ye 15 decembro 1959; ol esas listizita depos 1997 kom protektata kulturala monumento. L'edifico ofras du pleo-spaci: la Granda Domo (Großes Haus) kun 1008 sidili e c. 200 plei singlayare, e la Mikra Domo (Kleines Haus) kun 336 sidili e c. 120 yarala plei. Kontraste l'extera kubatra aspekto dil edifico, l'auditorii uzas plu kurva desegnuro.
L'edifico desegnesis dal germana arkitekto Werner Ruhnau. La kubatra extera shelo dil Granda Domo formacesis da 4500-metroquadrata vitra fasado, per qua on povas vidar l'internajo e la cilindratra kovrilo dil auditorio e la eskaleri, e la du monumentala skulturi dal franca artisto Yves Klein.
Oli konsistas ek monokroma sponjo-skulturo en distinta blua koloro ("Gelsenkirchen-Blua"). Duesma, kelke plu mikra verko, esas en blua e blanka.
Ta intense blua reliefi, videbla de extere tra la vitra pelo dil edifico, inspiris la grafik-artisto, Uwe Gelesch, enduktar blua kom la koloro di Gelsenkirchen.
Kande la teatro apertesis en 1959, ol provizis anke parolo-teatro, tipala germana Drei-Sparten-Theater (opero, baleto, teatraji). Austereso-demarshi en 1966/67 koaktis abandoneso di teatraji. Quale la maxim multa germana municipala teatri (Stadttheater), Musiktheater im Revier employas sua propra opero-kompanio e koro- e baleto-kompanio direktata da Bridget Breiner. La domo-orkestro esas la Neue Philharmonie Westfalen, la maxim granda de la tri stat-orkestri en Nordrheno-Vestfalia. L'orkestro financiziesas dal urbi Gelsenkirchen e Recklinghausen e la distrkto Unna. Johannes Kalitzke esis la chef-duktero de 1984 til 1990. Heiko Mathias Förster esas la nuna muziko-direktisto.