Objekto (programifo)

De Wikipedio
Jump to navigation Jump to search

En informatiko, objekto es simbolala ed autonoma kontenilo qua kontenas informi e mekanismi[1] pri temo, manipulati en programo. La temo es ofte ulo di tushebla dil reala mondo[2], [3]. Ico es la centrala koncepto dil objekt-orientizita programifo.

En objekt-orientizita programifo, objekto kreesas de modelo nomizita klaso o prototipo, de qua olu heredas la konduti e la traiti. La konduti e la traiti tipe apogesas sur la propri al kozi qui inspirabas l'objekto: persono (kun olua civil stando), dosiero, produkturo.

Historio[redaktar | redaktar fonto]

La nociono di objekto introduktesis kun la programifo-linguo Simula, kreita a Oslo inter 1962 e 1967 por faciligar la programifo di programi di simulado. Kun ica programifo-linguo, la traiti e la konduti dil objekti a simular deskriptesas en la fonta kodexo (source code).

La linguo di objekt-orientizita programifo Smalltalk kreesis da la centro di exploro Xerox ye 1972.

L'objekt-orientizita programifo divenis populara ye 1983 kun l'ekiro dil programifo-linguo C++, objekt-orientizita linguo, e l'uzado di olu volate similesas al populara linguo C.

L'unesma objekt-orientizita datumari komercaligesis ye 1993, e lia teknologio ne arivis a matureso ante la fino dil 20ma yarcento[4].

La linguo di objekt-orientizita programifo Java kreesis da Sun Microsystems ye 1995, e precipue destinesis al programifo dil reto-aplikaji, la teknologio di olu esis en plena evoluciono dum la yari 1990.

Terminaro[redaktar | redaktar fonto]

Klaso 
klaso es deskripturo dil traiti di un o di multa objekti. Singla objekto kreita de ica klaso es "instanco" (intance) dil traktata klaso.
Prototipo 
Prototipo es deskripturo di objekto, qua uzesos por krear altra objekti per kopio (programifo apogata sur prototipi).
Metodo 
metodo es serio di komandi qui manipulas la traiti e la stando di objekto.
Proprajo 
Proprajo, anke nomizata "feldo" (field) o "attributo", es traito propra a donata objekto.
Stando 
La stando di objekto es olua formo a donata instanto, quale dekriptata da la valori dil ensemblo di olua propraji.
Heredo 
Klaso heredas traiti di altra se olua defino fondesas sur l'altra. En tala kazo olua instanci uzas komune la traiti dil duo klasi. On parolas alora pri "subklaso" e "superklaso".
Polimorfismo 
Esas polimorfismo (per subtipizo) kande existas multa subklasi di sama superklaso e singla posedas olua propra varianto di sama metodo.

En ula objekt-orientizita lingui, la metodi, la propraji e la stando di objekto es manipulabla de altra objekti unike se li explicite deklaresas quale public. Ico es la mekanismo di enkapsulaciono.

Uzado[redaktar | redaktar fonto]

Inter la diversa teknologii qui gravitas cirkum la objekti, esas la lingui di objekt-orientizita programifo e la datumari objekt-orientizita. La nociono di objekto egale uzesas en la programifo di kompozanti di programaro ed anke en la koncepto di programaro.

Objekt-orientizita datumaro permisas la permananta provizuro di objekti, al helpo di sistemo di direktado di datumaro ed adaptata programifo-linguo.

La Object Management Group es internaciona konsorto di normalizado e di susteno dil teknologii apogata sur la objekti.

Kreita da la Object Management Group, CORBA es normo relativa al arkitekturo di programi qui kambias su kun objekti.

Kreita da la World Wide Web Consortium, la Document Object Model es normo relativa al manipulo dil elementi di reto-pagino per linguo di objekt-orientizita programifo quale JavaScript.

L'objekt-orientizita programifo[redaktar | redaktar fonto]

L'objekt-orientizita programifo es skribo-stilo dil fonta kodexo, propra ad ula programifo-lingui. En ica stilo, la fonta kodexo es serio di deskripturi di klasi o di prototipi, kun la deskripturo di lia traiti ("propraji") e di lia konduti ("metodi"). Smalltalk, Python, Java e C++ es lingui di objekt-orientizita programifo.

Noti e referi[redaktar | redaktar fonto]

  1. Angla Bhuvan Unhelkar, Practical Object Oriented Analysis, Thomson Learning Nelson - 2005, (ISBN 9780170122986).
  2. AnglaDavid Parsons, Object Oriented Programming with C++, Cengage Learning EMEA - 2002 (ISBN 9780826454287).
  3. AnglaSaba Zamir, Handbook of Object Technology, CRC Press - 1999 (ISBN 9780849331350).
  4. Angla Stanley Benjamin Zdonik e David Maier, Readings in Object-Oriented Database Systems, Morgan Kaufmann - 1990 (ISBN 9781558600003).
Wikipedia-logo.png Ica pagino uzas kontenajo en la Franciana Wikipedio. On povas trovar la originala artiklo ye fr:Objet (informatique); ol uzesas segun la GFDL-reguli.