Olimpiala Ludi en Los Angeles, 1984

L'Olimpiala standardo.

L'Olimpiala Ludi en Los Angeles, 1984, od oficale la 23ma Olimpiala Ludi, esis internaciona plursporta konkurso qua eventis en 1984 en Los Angeles, Kalifornia, Usa. Lore duesmafoye Los Angeles gastigis l'Olimpiala Ludi (le unesma eventis en 1932) e triesmafoye la Ludi eventis en Usa (le unesma eventis en 1904).

La Ludi komencis ye la 28ma di julio e finis ye la 12ma di agosto 1984. Partoprenis 6.829 atleti (5.263 viri e 1.566 mulieri) de 140 landi e teritorii qui havis Olimpiala komitati. Esis 221 eventi de 23 sporti.

Selekto dil urbo

En 1979 elektesis la sideyo di l'Olimpiala Ludi en 1984. Pro l'informi pri la granda debaji di Montréal rezulte de l'Olimpiala Ludi en 1976, nur du urbi prizentis sua kandidateso: New York e Los Angeles. Quoniam l'Olimpiala Komitato ne admisis plu kam 1 kandidata urbo por singla lando, ol aceptis la decido dal Usana Olimpiala Komitato, qua selektis Los Angeles vice New York.

Los Angeles ne havis debajo rezulte de la Ludi; kontree ol havis profiti, quin on uzis por krear l'Amatora Atletala Fonduro.

Sovietiana boikoto

Landi qui boikotis la Ludi: en Montreal en 1976 (flave); en Moskva en 1980 - (blue); ed en Los Angeles en 1984 (rede).

Sovietia e 13 altra komunista landi membri dil pakto di Warszawa boikotis la Ludi. Sovietia anuncis lua boikoto ye la 8ma di mayo 1984, ed oficale mencionis "shovina sentimenti e histerii kontre Sovietani montrata da Usa".

Rumania (guvernita lore da Nicolae Ceauşescu) esis la singla membro dil pakto di Warsawa qua partoprenis la Ludi. Rumaniani ganis 53 medalii (20 ora, 16 arjenta e 17 bronza), la duesma lando en la rango di medalii. Anke Popul-Republiko Chinia (la 4ma en la rango di medalii en 1984) ed Yugoslavia (la 9ma), komunista landi qui ne esis membri dil pakto di Warszawa, partoprenis la Ludi.

Kelka fakti

Enireyo dil Memorala Stadio di Los Angeles, ube eventis l'inaugural e klozal ceremonii di la Ludi.

• Popul-Republiko Chinia partoprenis unesmafoye, e ganis 15 ora medalii. Pos 1984, Republiko Chinia partoprenas sub la nomo "Chiniana Taipei".
• Carl Lewis konkursis unesmafoye e ganis 4 ora medalii: 100-metra, 200-metra, 4X100-metra relayo, e disto-salto.
• Maratono por mulieri eventis unesmafoye, vinkita da Joan Benoit. Dum la lasta rondiro, Suisa atletino Gabi Andersen-Schiess falis multafoye til l'arivo-lineo, pro exhausteso.
• Portugalan atleto Carlos Alberto de Sousa Lopes ganis l'unesma ora medalio por lua lando en la maratono ed establisis nova Olimpiala rekordo: 2 hori, 9 minuti e 21 sekundi.
• Nawal El Moutawakel de Maroko divenis l'unesma Mohamedano qua ganis ora medalio por 400-metra kurado kun obstakli por mulieri.
• Britaniana Sebastian Coe vinkis duesmafoye la 1.500-metra kurado (unesme en Moskva, 1980).
• Sinkronigata natado aparis en la Ludi unesmafoye.
• Mary Lou Retton divenis l'unesma Usanino qua ganis ora medalio por Olimpiala gimnastiko por mulieri, quankam la Rumanian esquado tradicionale konsideresis forta en ta konkurso.
• Francia ganis ora medalio pri futbalo pos vinkar Brazilia per 2-0.
• Teniso e basbalo aparis kom demonstro-sporti.

Medalii ganita

Usan esquado dum l'inauguro-ceremonio en Los Angeles, 1984.

Fino-lineo por 400-metra kurado en Los Angeles, 1984.

Yen la listo di landi qui recevis adminime 1 medalio en Los Angeles en 1984.

#	Lando	Ora	Arjenta	Bronza	Entote
1	Usa	83	61	30	174
2	Rumania	20	16	17	53
3	West-Germania	17	19	23	59
4	PR Chinia	15	8	9	32
5	Italia	14	6	12	32
6	Kanada	10	18	16	44
7	Japonia	10	8	14	32
8	Nova-Zelando	8	1	2	11
9	Yugoslavia	7	4	7	18
10	Sud-Korea	6	6	7	19
11	Unionita Rejio	5	11	21	37
12	Francia	5	7	16	28
13	Nederlando	5	2	6	13
14	Australia	4	8	12	24
15	Finlando	4	2	6	12
16	Suedia	2	11	6	19
17	Mexikia	2	3	1	6
18	Maroko	2	0	0	2
19	Brazilia	1	5	2	8
20	Hispania	1	2	2	5
21	Belgia	1	1	2	4
22	Austria	1	1	1	3
23	Kenia	1	0	2	3
23	Portugal	1	0	2	3
25	Pakistan	1	0	0	1
26	Suisia	0	4	4	8
27	Dania	0	3	3	6
28	Jamaika	0	1	2	3
28	Norvegia	0	1	2	3
30	Grekia	0	1	1	2
30	Nigeria	0	1	1	2
30	Porto-Riko	0	1	1	2
33	Kolumbia	0	1	0	1
33	Ivora Rivo	0	1	0	1
33	Egiptia	0	1	0	1
33	Republiko Irlando	0	1	0	1
33	Peru	0	1	0	1
33	Siria	0	1	0	1
33	Tailando	0	1	0	1
40	Turkia	0	0	3	3
40	Venezuela	0	0	3	3
42	Aljeria	0	0	2	2
43	Kamerun	0	0	1	1
43	Taiwan	0	0	1	1
43	Dominikana Republiko	0	0	1	1
43	Islando	0	0	1	1
43	Zambia	0	0	1	1
Totali		226	219	243	688