Portalo:Brazilia/Geografio

De Wikipedio
Salti al navigilo Irez a serchilo
Mapo di Brazilia kun lua precipua urbi.
En la sudo di Brazilia povas nivar en alta regioni dum vintro.

Brazilia esas la 5ma maxim granda lando dil mondo, pos Rusia, Kanada, Populala Republiko di Chinia ed Usa, e korespondas a 47% de la teritorio di Sud-Amerika.

Equatoro e Tropiko di Kaprikorno krucumas Braziliana teritorio. Granda parto di Braziliana teritorio jacas inter la du linei, e plu kam 600.000 km² jacas sude de Tropiko di Kaprikorno. To rezultas en diversa peizaji e klimati.

Norde di la lando, en Amazoniana regiono, existas equatorala e tropikala foresti kun equatorala klimato. De la centro di lando til Tocantins, sudo di Maranhão e Piauí e westo di Bahia, este de l'equatorala foresto, existas vejetantaro di savano e tropikala klimato kun du sezoni: 6 monati sika, 6 monati pluvoza. Este de ta regiono (en la centro di Bahia, westo di Sergipe, Alagoas, Pernambuco, Paraíba, Rio Grande do Norte, Ceará e Piauí, e nordo di Minas Gerais) existas mi-arida klimato. Pluvo esas poka e neregulala. La vejetantaro konocesas por la nomo caatinga, signifikante "sika foresto".

De la litoro di Nord-estala regiono til granda parto di Sud-estala regiono existis tropikala foresto konocita en Portugalana kom Mata Atlântica (Atlantika foresto). Ol esis l'unesma Braziliana peizajo trovita dal Portugalani, en 1500. Nune ta regiono esas forte populizita, e lua peizajo modifikesis per agrokultivo, per edukado di bovaro, porki ed altra animali, e dal industrio. Nune nur existas min kam 10% de l'originala Atlantika foresto.

En alta regioni dil sudo di Brazilia la klimato esas subtropikala kun 4 sezoni: somero de decembro til marto, autuno de fino di marto til junio, vintro de junio til septembro, e printempo de septembro til decembro. En kelka regioni existis foresti di koniferi, ma nune nur restas kelka bosketi. En ta regiono povas nivar en alta monti dum vintro. Fine, en sudo ed en westo di Rio Grande do Sul existas regiono kun naturala pastureyo nomizita Pampa, kun prolongi en Arjentinia ed Uruguay.