Sovaja oxalo

Sovaja oxalo (Oxalis acetosella) esas basa e tenua planto qua vivas maxim bone en tenebrala piceo-foresto. Nur filiko prosperas kun sovaja oxalo en ca tenebreso. La planto quik perisas se la suno ulakauze atingus lua kreskoloko.

Sovaja oxalo havas tri kordio-forma folii en fino di la stipito. La folii esas tre dina.

Sovaja oxalo havas komparante a lua folii granda flori, qui ofte kreskas en grupi. La basala koloro esas blanko kun violea strii, ma anke preske tote violea flori existas. Sovaja oxalo florifas frue en printempo uzante energio rezervita en lua subsulala stipito ma la florifo duras longe en somero. La somerala flori ne desfaldesas e la planto produktas grani sen insekti. En lua folikulo esas c. 15 grani, qui jetas su mem a disto di 2 metri. L’ adheriva grani iras fore anke en furo di animali.

En vespero la flori turnas su advale kam li komencus dormar. En realeso la planto tale diminutas transpiranta areo. Anke la folii esas sensitiva a tusho.

La folii esas uzata en salado vice citrono. La saporo di la folii esas acerba e semblas la saporo di rubarbo ed oxalo. La folii kontenas oxala acido qua supresas mem la apetito di limaki. La folii kontenas anke C-vitamino, kalio e kalcio. En populala kuracado on uzis sovaja oxalo kontre febro e skorbuto. On anke pensis, ke ol detersus sango.

Segun nuna savo, l’ uzo di sovaja oxalo ne esas rekomendata. En granda quanto l’ oxala acido domajas la reni. Ma kom senmakuligilo ol esas ankore uzebla.