Mary Read

De Wikipedio
Graburo di Mary Read

Mary Read (c. 1690 - 1721) anke konocata kom Mark Read, esis angla pirato.  El ed Anne Bonny esas du ek la maxim famoza piratini di omna tempo; eli esas la sola du mulieri certe kondamnita pro pirateso dum la frua 18ma yarcento, ye la kolmo di la Ora Epoko di Pirateso.

Frua vivo[redaktar | redaktar fonto]

Mary Read naskis bastarde en Anglia, en la tarda 17ma yarcento, a la vidvino di navo-kapitano.  Elua naskodato disputesas da historiisti pro refero a la "Pakto di Ryswick" da elua tatempa biografo Captain Charles Johnson en A General History of the Pirates.  Il forsan eroris, intencinta referar la "Pakto di Utrecht".  Omnakaze, el naskis cirkume 1691.

Pro ke el gravideskis pro afero pos la desaparo di sua spozulo, la matro di Read probis celar la nasko di sua filiino, Mary.  El komencis travestiar Mary kom puerulo pos la morto di Mark, la plu olda fratulo di Mary.  El deziris dure recevar pekunio del patrala avino di Mary.  L'avino semble trompesis, e Mary ed elua matro profitis la heredajo til elua adoleco.  Ankore vestizita puerulatre, Mary trovis laboro kom lakeo, e plu tarde employeso en navo.

El plu tarde adheris la britana armeo, aliancinta kun Nederlando kontre Francia (forsan dum la Nonyara Milito o dum la Milito dil Hispana Sucedo).  Mary, vestizita viratre, luktis sucesoze, ma el amoreskis flandriana soldato.  Kande li mariajesis, el aquiris drinkeyo "De drie hoefijzers" ("La Tri Kavaloferi") proxim Breda-Kastelo en Breda, Nederlando.

Lor la frua morto di sua spozulo, Mary rikomencis viratra vestizeso, ed anke armeala servo en Nederlando.  Pro paco, esis nula posibleso di avanco, do el demisionis ed abordis navo vers West-India.

Pirato[redaktar | redaktar fonto]

La navo di Mary kaptesis da pirati, qui koaktis el adherar li.  El aceptis la pardono dil Rejo c. 1718-1719, ed aceptis korsaro-komiso; to finis kande el partoprenis kru-sedicio.  En 1720 el unionis su kun la pirato John "Calico Jack" Rackham e lua kompano, la pirato Anne Bonny, qui amba kredis ke Mary esis viro.  Ye 22ma agosto 1720 la trio furtis la armizita slupo William de la portuo di Nassau.

La muliereso di Mary revelesis kande Bonny informis Mary ke el ipsa esis muliero, semble pro ke el atraktesis a Mary.  Komprenante to, Mary revelis ad Anne sua propra muliereso.  Tamen, Rackham, la amoranto di Bonny, ne savis lo e suspektis amorafero inter la du.  Por moderar ilua jaluzeso, Bonny informis lu ke Mary esis anke muliero.

Kapto ed enkarcerigo[redaktar | redaktar fonto]

Ye 15ma novembro 1720, pirato-chasero Kapitano Jonathan Barnet surprizis la kruo di Rackham dum rum-partio kun altra kruo de angli ye Negril Point proxim la westa marbordo di Jamaika.  Pos ke salveo deskapabligis la pirato-navo, la kruo di Rackham e lia gasti fugis a la holdo, lasante nur la mulieri ed un altra por defensar la navo (esas anke posibla ke Rackham e lua kruo esis tro ebria por luktar).  Raportite, Mary pafis furioze aden la holdo, ocidante un persono, e vundante altri, kande la viri refuzis kunluktar.  La kruo di Barnet fine vinkis la mulieri.  Rackham cedis, e demandis "indulgo".

Rackham e lua kruo arestesis e procesigesis en nuna Spanish Town, Jamaika, ube li kondamnesis a pendar pro pirateso, quale anke Read e Bonny.  Tamen, la mulieri evitis pendigeso per revelar ke eli esis amba "quick with child" (gravida, konocita kom "pleading the belly"), e tale grantesis provizora pardono.

Mary Read mortis pro violentoza febro en karcero.  Elua enterigeso ye 28ma aprilo 1721 trovesas en la registro dil kirko St. Catherine's Church en Jamaika.  Esas nula traco di enterigo di elua bebeo, to quo sugestas ke el forsan mortis dum gravideso.