Ritmala gimnastiko

De Wikipedio
Gimnastikistini kun ringi (stacata) e mazi (sidata).
Gimnastikistino prizentas su kun rubando.

Ritmala gimnastiko esas brancho de gimnastiko qua havas senfina posiblesi pri exercomovi, e kombinas elementi de gimnastiko, baleto e teatrala danso. L'exercomovi facesas en harmonio kun muziko, ed uzas kin diferanta sportal equipuri: balono, kordo, rubando, ringo e mazi, o povas uzar nula equipuro. La konkursi pri ritmala gimnastiko existas nur por mulieri, e la prizentadi povas durar de 75 sekundi (individuala prizentado) til 150 sekundi (por grupi di gimnastikisti).

L'unesma studii pri ritmala gimnastiko developesis dal filozofo Jean-Jacques Rousseau, ma erste dum la yari 1940ma komencis existar konkursi pri ol, komence en Sovietia. L'Internaciona Federuro pri Gimnastiko agnoskis ta sporto en 1961, komence sub la nomo moderna gimnastiko, e pose sub la nomo ritmala sportala gimnastiko. En 1980 ol divenis Olimpiala sporto, ed aparis unesmafoye dum l'Olimpiala Ludi en Moskva, 1980 kom demonstro-sporto. Erste em 1984 en Los Angeles eventis l'unesma individuala konkurso pri ritmala gimnastiko, e Kanadana atletino Lori Fung ganis l'unesma ora medalio. Dum l'Olimpiala Ludi en Atlanta eventis l'unesma konkurso pri ritmala gimnastiko por grupo. Hispana esquado, qua havis inter altri l'atletini Marta Baldó Marín e Nuria Cabanillas ganis la ora.