Tequila, Jalisco
Santiago de Tequila o Tequila (lingui Nahuatl: Tequillan, Tecuila "loko di tributo") esas Mexikiana urbo e municipo situita en la stato Jalisco, c. 60 km del urbo Guadalajara.
Tequila konocesas kom la naskeyo dil alkoholoza drinkajo samanoma, “tequila,” qua faceseas per la planto blua agavo, indijena en ta areo. La sino dil planto kontenas sukri ed esis uzata dal indijena homi hike por facar fermentacita drinkajo. Pos ke la hispani arivis, li trovis ica fermentacita drinkajo e distilis ol, tale produktinte la tequila quan on konocas hodie.
Pro la populareso dil drinkajo ed olua historio l'urbo e cirkondant areo esas Mondala Heredajo-Situo di UNESCO. Ol anke nomizesis "Pueblo Mágico" (Magial Urbo) en 2003 da la federala guvernerio di Mexikia.
En 2010 la habitantaro dil urbo esis 26.809, e dil muncipo esis 40.697, en areo de 356.14 km2.
Tequila havas klimato subtropika mi-arida, kun vintri e printempi sika e dolca. La temperaturo mezvalora esas 23,2 °C. Pluvas normale inter la monati junio ed oktobro.
Tequila esas anke famoza pro esar la ceneyo dil sucesoza telenovela (sapon-dramato) Destilando Amor, kun l'aktori Angélica Rivera ed Eduardo Yáñez.