Alfabeto Braille

De Wikipedio
Irez a navigado Irez a serchilo
Manuo lektanta Braille-a texto sur ligna pasamano

L'alfabeto Braille esas skribosistemo inventita da Franco Louis Braille por blindi e homi kun tre mala vidosenso. Ol esas skribosistemo reliefala e konsistas ek punti qui salias de papero o de altra surfaco. On lektas Braille-a texto palpante ol per fingropinto.

La kodexo[redaktar | redaktar fonto]

Braille-a celulo kun la punti numerizita

En la normala alfabeto Braille singla signo reprezentesas per celulo ek 6 punti rangizita en du koloni. Singla signo konsistas ek un til sis salianta punti. Segun normo, ta punti numerizesas de supre a base e de sinistre addextre, quale sur la yena skemo.

Exemple, litero c skribesas per la du supra punti, t.e. la kombinuro 1-4. Ica sistemo posibligas skribar til 63 signi (celulo kun nula punto reprezentas spaceto).

La signifiko de singla signo dependas de la uzata linguo, quo explikas pro quo la Braille-a alfabeti Franciana, Japoniana, Koreana, kirila ed altra interdiferas. La lingui qui uzas la Latina alfabeto maxim ofte uzas la sama kodexado por la bazala literi, ma povas diferar la literi supersignizita, altra simboli e, kelkafoye mem puntizo-signi.