Carl Friedrich Abel

Carl Friedrich Abel (n. 22ma di decembro 1723, m. 20ma di junio 1787) esis Germana muzikisto, rezidanta en Anglia de 1759.

Il naskis en Köthen; ilua patro esis muzikisto en la orkestro di la korto di Köthen. Carl esis skolano en Leipzig, ed il docesis da Johann Sebastian Bach. Pro la rekomendo di Bach, il divenis membro en 1743 di la orkestro di la korto di Dresden. En 1759 il iris a London, ed esis membro di la chambro-orkestro di Rejino Charlotte, spozino di George la 3ma. Johann Christian Bach, filiulo di J S Bach, arivis en London en 1762; il ed Abel divenis amiki, e li establisis koncerti di qua la admisati pagis aboni, la unesma tala koncerti en Anglia. Ca koncerti duris til la morto di J C Bach en 1782.