Het melkmeisje

Het melkmeisje

Het melkmeisje, anke konocata kom De keuken- of melkmeid esas pikturo da la nederlandana maestro Johannes Vermeer, piktita c. 1658. En aucionkatalogo di 1696 on listizis la verko kom ‘Een Meyd die melk uytgiet’ (Yunino qua varsas lakto).

La nomizo Het melkmeisje esas fakte nejusta pro ke melkmeisje esis muliero qua provizis lakto a domo; la piktita muliero esis servistino. El esas tale rikonocebla per elua simpla vesti e basigita boneto. El stacas meze dil imajo, en chambro kun sinistre fenestro, tra quo la lumo eniras. Avan elu, sinistre e sub la fenestro, esas tablo, kovrita per tuko, sur quo esas korbo kun pano, krucho, ed altra kozi. La yunino varsas lakto ek krucho aden bolo sur la tablo; el atencas la varso.

La chambro esas skarse moblizita, dextre esas forno. La muro dop el sugestas chambro kun pasinto; esas trui en ol e klovo. Per radiografiala ed infrareda exploro konfirmesis ke Vermeer originale sur la muro dop la yunino kreis pikturo.

Esas posibla ke Vermeer ye alegoriala maniero volis reprezentar ‘moderemeso’. Varsanta muliero kun ica signifiko aparas nome reguloze en 17ma-yarcenta emblemlibri, quala ta da Jacques de Gheyn II.

En 1765 la pikturo aucionesis kande Leendert Pieter de Neufville vendis la kolekturo di sua patro. La verko kompresis en 1908 de la heredinti di Lucretia Johanna Winter da Rembrandt por la Rijksmuseum Amsterdam, ube ol ankore rezidas.