Kanikulo
Kanikulo esas periodo dum qua vetero esas tre varma, e qua produktas serio de varmega dii.
To quo exakte esas kanikulo dependas forte de ube on trovesas en la mondo. Kanikulo esas plu sever en urbala regiono pro l'efekto di la varmeges-insulo.
Riski sanesala di varmegeso[redaktar | redaktar fonto]
Se la temperaturo restas dum longa periodo super 25° Celsio, homi povas havar problemi sanesala pro la varmegeso. Ta problemi povas esar enoyanta, quale tro-varmesko. Ma la problemi anke povas esar plu severa, quale hipertermo. Varmegeso povas esar mortigiva dum temperaturo di humida bulo de 35°.
Etimologio[redaktar | redaktar fonto]
Kanikulo venas de la Franca canicule, qua, olua-latere pruntesas de la Latina canicula, qua esas la diminutiva formo por canis (hundo), do fakte: hundeto. Ta vorto uzesas depos la Romano Varron, por tradukar l'anciene Greka κύων kúôn, nomizante la partikulare brilanta stelo Canicula di la stelaro di Granda Hundo, stelo nun nomizata Sirius.
Ja en Egiptia antiqua, la deino Sopdet, personigo di la stelo Sirius, esis akompanata da hundo. Ofte Sirius simple reprezentesis da ca animalo. La suno-ligita levesko di Sirius, periodo dum qua la stelo Sirius levas su ye sama tempo kam la suno e do esas videbla dum l'auroro, merkis la nova yaro Egiptian e la komenco di la kresko di la Nilo cirkum la 19ma di julio, la maxim varma periodo di la yaro. Ye la 45ma nivelo paralel a la norda hemisfero, do en Europa, e lor la periodo de la 24ma di julio til la 24ma di agosto, ca tre lumoza stelo levas su sama-tempe kam la suno : ca konstato pensigis dal ancieni ke existis ligo inter l'aparo di ca stelo e la granda varmegesi meteorologiala. Tale Plinus l'Anciena skribis: "Koncernante la Kanikulo, qua ne savas ke ol, levanta su, lumizas l'ardoro di la suno ? L'efekti di ta astro esas la maxim povoza sur la tero: la mari bolias pro olua levesko, la vini fermentacas en la keleri, l'aqui stagnanta agiteskas".
