Modest Mussorgsky

De Wikipedio
Jump to navigation Jump to search
Modest Mussorgsky
Modest Musorgskiy 1870.jpg
Profesiono: kompozisto
Lando: Flag of Russia.svg Rusia
Naskodato: 9 di marto 1839, 28 di februaro 1835, 28 di marto 1835, 1838, 1834
Nasko-loko: Karevo, Rusa imperio
Mortodato: 28 di marto 1881, 1880
Morto-loko: Sankt Petersburg, Rusa imperio

Modest Petrovich Mussorgsky (rusa: Модест Петрович Мусоргский; 21ma di marto 1839 - 28ma di marto 1881) esis rusa kompozisto, membro dil grupo konocata kom la "Grupo de Kin".

Il esis novigero di rusa muziko dum la Romantika periodo. Il esforcis atingar unike rusa muzikala identeso, ofte defianta la establisita konvencioni di westala muziko.

Multa lua verki inspiresis da rusa historio, rusa folkloro, ed altra nacionalista temi. Tala verki inkluzas la opero Boris Godunov, la orkestrala ton-poemo Nokto sur Kalva Monto, e la piano-serio Pikturi che Expozo.

Dum multa yari la verki da Mussorgsky precipue konocesas per versioni revizita o kompletigita da altra kompozisti. Multa lua max importanta kompozuri posmorte populareskis ye lia originala formi, ed ula originala particioni esas nun anke havebla.

Nomo[redaktar | redaktar fonto]

La espelo e pronunco dil nomo di la kompozisto produktis kelka konfundo.

La familio-nomo derivesas de 15ma- o 16ma-yarcenta ancestro, Roman Vasilyevich Monastyryov, qua aparas en la Velura Libro, 17ma-yarcenta genealogio de rusa boyari. Roman Vasilyevich havis alternativa nomo "Musorga", ed esis la avulo dil unesma Mussorgsky. La kompozisto povis sequar sua lineajo a Rurik, legendala 9ma-yarcenta fondinto dil rusa stato.

En familio-dokumenti la espelo dil nomo varias: "Musarskiy", "Muserskiy", "Muserskoy", "Musirskoy", "Musorskiy" e "Musurskiy". En la baptala registro la nomo aparas kom "Muserskiy".

Frua vivo[redaktar | redaktar fonto]

Mussorgsky naskis en Karevo, Toropets Uyezd, Pskov, Rusa Imperio, 400 km sude de Sankt Petersburg. Lua richa tero-proprietanta familio, la nobela familio Mussorgsky, repute decendas del unesma Ruteniana regnero, Rurik, per la suverena princi di Smolensk. Evinta sis yari Mussorgsky komencis recevar piano-lecioni de sua matro, ipsa pianisto. Lua progreso esis sat rapida ke tri yari pose il povis plear koncertomuzikajo da John Field e verki da Franz Liszt por familio ed amiki. En 10 yari, il e lua fratulo prenesis a Santa Petersburg por studiar che la elitala german-lingua Petrischule. Dum ibe, Modest studiis piano kun Anton Gerke. En 1852, la 12-evinta Mussorgsky editis piano-muzikajo kun titulo "Porte-enseigne Polka", pagita da lua patro.

Mussorgsky kom yuna kadeto

La genitori di Mussorgsky projetis la translojo a Santa Petersburg por ke amba filiuli rinovigez la familio-tradiciono di militala servo. Taskope, Mussorgsky eniris la Kadet-Skolo evinta 13. Esis kontroverso pri edukala atitudi che ta skolo e lua direktisto, Generalo Sutgof. Omnu konkordis ke la skolo povus esar brutala loko, aparte por nova rekrutiti. Por Mussorgsky, ol probable esis la fonto di lua voyo vers alkoholikeso. Segun olima studento, kantisto e kompozisto Nikolai Kompaneisky, Sutgof "esis fiera kande kadeto retrovenis de vakanco ebria pro champanio."

Verki[redaktar | redaktar fonto]

La verki da Mussorgsky, malgre frapante nova, esas stile Romantika e cherpas de rusa muzikala temi. Il inspiris multa rusa kompozisti, inkluzite Dmitri Shostakovich (lua tarda simfonii) e Sergei Prokofiev (lua operi).

En 1868/1869 ilu kompozis la opero Boris Godunov, pri la vivo dil rusa caro, ma ol refuzesesis dal Mariinsky Opera. Mussorgsky do redaktis la verko, til finala versiono en 1874. La frua versiono egardesas kom plu tenebroza e konciza kam la tarda versiono, ma anke plu kruda. Nikolai Rimsky-Korsakov ri-instrumentizis la opero en 1896 e revizis ol en 1908. La opero anke revizesis da altra kompozisto, notinde Shostakovich, qua facis du versioni, un por filmo ed un por teatro.

La opero Khovanshchina esis nefinita e nepleita kande Mussorgsky mortis, ma ol kompletigesis da Rimsky-Korsakov ed unesmafoye pleesis en 1886 en Santa Petersburg. Ta opero anke revizesis da Shostakovich. La Ferio che Sorochyntsi, altra opero, esis nekompleta lor lua morto, ma dans-etraktajo, la Gopak, freque pleesas.

La max imaginiva e freque pleata verko da Mussorgsky esas la ciklo de piano-muzikaji qua deskriptas pikturi per sono, Pikturi che Expozo. Ica kompozuro, maxim bone konocata per orkestral aranjuro da Maurice Ravel, skribesis memore lua amiko, la arkitekto Viktor Hartmann.

Lua un-movimenta orkestrala verko Nokto sur Kalva Monto juis populara agnosko dum la yari 1940ma kande ol uzesis, kun 'Ave Maria' da Schubert, en la Disney-filmo Fantasia.