Pulsaro

De Wikipedio
Emiso di radiaco gamma da pulsaro Vela
Pulsaro che nebuloso Krabo. L'imajo kombinas fotografuri obtenita da teleskopo Chandra e da kosmala teleskopo Hubble.

Pulsaro (PULSantA Radioemisanta-stelo), esas cielala radiaco-fonto qua emisas kurta, extreme reguloza pulsi de elektromagnetala radiaco.

La intervalo di pulsi de ula pulsaro esas de milisekundi a plura sekundi. Malgre ke la pulso-frequeso varias inter pulsari, singla pulsaro havas frequeso alte reguloza. Probable existas cirkume 10.000 pulsari che lakto-voyo.

Historio[redaktar | redaktar fonto]

Pulsaro esis unesmafoye observata ye 28 di novembro 1967. En Cambridge, Anglia, Jocelyn Bell Burnell ed Antony Hewish notis ke pulsi, singla 1,33 sekundi, venis de sama loko en la cielo, e ke la pulsi adheris a stelo-tempo, do lo ne esis terala interfero. Plu tarde establesis ke pulsaro esas rotacanta neutrono-stelo o nano-stelo; ol emisas radiaco-fasko qua esas observata kande la fasko pasas tra Tero.