Sovaja Chaso
La Sovaja Chaso es folklorala motifo en Europana folkloro, precipue en kulturi kun German e Kelta influi. Multa diferanta nomi uzesas por la Sovaja Chaso en diversa kulturi, la nomo "Sovaja Chaso" esas ciencala nomo. Grupo di feroca supernatura chasanti chasas en la Sovaja Chaso tra la cielo viktimo, qua povas esar homo, animalo od altra figuro ed ofte esas inocento. La chasanti povas esar fei, elfi, nani, demoni, mortinti od altra enti. La duktero dil Sovaja Chaso ofte esas Wodan/Odin, rejo Arthur, deo di la mortinti, altra persono folkloral od mitologial, historiala figuro, damnita ento o la diablo, ed ofte uzas stranja kavalko (Sleipnir, kapro, hundo, porko). Ultempe la duktero chasas sole. Komuna motifo en rakonti esas ke spektanto povas divenar la viktimo dil chasanti.
Unesme ciencale dokumentizita da Jacob Grimm, l'eminenta Germana filologo e folkloristo, en ilua libro Deutsche Mythologie, la Sovaja Chaso esas temo di studio ciencala delor 1835. Atesto di la motifo esas plu anciena, sacerdoto Normandiana, nome Gauchelin, skribis pri ol dum la 11ma yarcento.
Etimologio
[redaktar | redaktar fonto]"Sovaja Chaso" devenas del Germana vorto wilde Jagd, quan Jacob Grimm uzis por la motifo. Tradikuro di ca vorto uzesas en multa lingui kom termino ciencal. On anke dicas wildes Heer en la Germaniana.