St. Pauli
St. Pauli o Sankt Pauli esas quartero dil urbo Hamburg en la centrala distrikto Hamburg-Mitte.
An la dextra rivo dil fluvio Elbe, la proxima Landungsbrücken esas nordala parto del portuo di Hamburg. St. Pauli kontenas mondo-famoza "distrikto di reda lumi" cirkum l'areo Reeperbahn.
En 2016 la quartero havis 22 595 rezidanti.
Komence dil 17ma yarcento ol developesis kom preurbo 'Hamburger Berg' exter la pordegi dil proxima urbo Hamburg, e proxim l'urbo Altona. La nomo devenas de kolino projetita da Hamburg en 1620 por defenso-skopi. Do, habito unesme permisesis ibe, ma balde komerci, dezirita nek en Hamburg nek en Altona, pro lia odoro o bruiso, translojis a 'Hamburger Berg'. Anke la kordisti (o 'Reeper' en Basa Germana) translojis adibe, pro manko de spaco en l'urbo. La nomo dil famoza strado Reeperbahn devenas de lua historio di kordifo. Kande homi oficale permisesis lojar en St. Pauli ye la fino dil 17ma yarcento, l'urbo-guvernerio movis indij-azili e hospitali ek l'urbo a 'Hamburger Berg,' qua pose nomizesis pro l'ankore existanta kirko, 'St. Pauli'.
St. Pauli uzesis precipue da maristi por amuzo dum lia sejorni en Hamburg ed Altona. Til hodie ol konocesas kom la "pekoza milio", kombinanta la alta e basa sorti de amuzo, de muzikali, teatri, a drinkeyi e klubi, ultre la famoza "distrikto di reda lumi".
St. Pauli situesas an la nordala rivo dil fluvio Elbe proxim la portuo Hamburg. Ol situesas sude de Eimsbüttel, weste de Hamburg-Neustadt ed este de Altona. La quartero havas tota areo de 2,6 km².
St. Pauli havas longa tradiciono kom distrakto- ed amuzo-centro. La portuo di Hamburg duktis multa maristi a Hamburg qui preferis pasar sua libera tempo [dum deskargo e rikargo di navi) en ta areo. Depose lore esas prostituco en St. Pauli, ed ol ankore konocesas kom la distrikto di reda lumi di Hamburg. La distrikto di reda lumi esas areo de kelka stradi cirkum la Reeperbahn, ofte referata kom la Kiez.
Drinkeyi e muziko-klubi havas tradiciono en la Kiez St. Pauli. Le Beatles lojis en St. Pauli e pleis che la Star-Klubo ante ke li divenis famoza. Li honorizesis per nomizo dil placo Beatles-Platz.
L'aktoro/kantisto Hans Albers forte asociesas kun St. Pauli, e provizis la neoficala himno dil vicineyo, "Auf der Reeperbahn Nachts um Halb Eins" del filmo Große Freiheit Nr. 7. La placo Hans-Albers-Platz proxim Reeperbahn nomizesis pro lu.
La transporto-sistemo di Hamburg servas St. Pauli per la S-Bahn-stacioni Landungsbrücken e Reeperbahn, e la subtera-fervoyo-stacioni Landungsbrücken, St. Pauli, e Feldstraße. Publika transporto anke provizesas per autobusi e per paromi alonge ed al altra rivo dil fluvio Elbe.
Hamburg, kom granda portuo-urbo, havas tre proxima ligi kun Popul-Republiko Chinia ed Azia generale. Granda nombro de chiniana ed altra aziana enmigrinti duras lojar en la distrikti St. Pauli ed Altona, dum ke nov arivinti anke atraktesas a ta parto dil urbo.