Richard Wagner
| Richard Wagner | ||
| ||
| Profesiono: | kompozisto | |
| Lando: |  Germania
| |
| Naskodato: | 22 di mayo 1813, 1812 | |
| Nasko-loko: | Leipzig | |
| Mortodato: | 13 di februaro 1883, 1882 | |
| Morto-loko: | Venezia | |
Richard Wagner (1813 til 1883) esis Germana kompozisto di operi.
La Fluganta Holandano
[redaktar | redaktar fonto]Ye 2 di januaro 1843 en Dresden, ilua opero La Fluganta Holandano esis unesmafoye pleata. Ol esas la maxim frua de ilua operi qua havas granda reputeso. En mayo 1840 il komencis skisar la rakonto, fondita sur rakonto da Heinrich Heine, ed en novembro 1841 la opero esis kompleta. En la opero, la kapitano di navo esas kondamnita eterne seglirar, til ke il trovos homino qua fidele amorus il til morto. Pos sep-yara periodo il darfas irar sur tero por serchar tala homino.
Tannhäuser
[redaktar | redaktar fonto]Ye la 19ma di oktobro 1845, en Dresden, ilua opero Tannhäuser esis unesmafoye pleata. Wagner komencis kompozar la verko en la somero di 1843 ed ol esis kompleta en aprilo 1845, la uverturo esante la lasta parto skribita. La rakonto eventas ye la kastelo di Wartburg en la 14ma yarcento, ube la landgravo di la valo di Thuringia aranjas konkurso di Minnesänger (trubaduri). Wagner, ne tote kontenta pri la opero ye la unesma pleado, facis multa chanji por olua pleo en Paris en 1861.
Die Meistersinger von Nürnberg
[redaktar | redaktar fonto]En München ye 21 di junio 1868, lua opero Die Meistersinger von Nürnberg esis unesmafoye pleata. La produkturo, qua esis financale sustenata da rejulo Ludwig 2ma di Bayern, esis sucesoza. Wagner ipsa kreis la rakonto di la opero. Vice la kustumala mitala o legendala origino di altra operi di Wagner, ca opero fondesis sur reala mez-epoka gildo di amatora maestro-kantanti en Nürnberg, pri qua la kompozisto lektis dum vakanco en 1845. Il skribis la libreto e la uverturo en 1862, e la opero esis kompletigata en 1867.
Der Ring des Nibelungen
[redaktar | redaktar fonto]En München ye 22 di septembro 1869 eventis la unesma pleado di lua opero Das Rheingold. Ol esis la unesma de quar operi kune titulizita Der Ring des Nibelungen ("La Ringo di la Nibelung"). Ye 26 di junio 1870 en München, la duesma opero Die Walküre esis unesmafoye pleata.
Wagner skisis rezumala naraco di la projetata operi en 1848; ilua fonto esis Germana e Skandinavian mitologio, e partikulare la mez-epoka Germana epikajo Nibelungenlied. Il intencis komencar skribante opero pri la morto di la precipua karaktero Siegfried (olqua divenis la finala opero Götterdämmerung); tamen il decidis explikar la eventi qui duktis a la morto di Siegfried, qui okupis la dramato di la unesma tri operi.
Das Rheingold esis kompleta en 1854 e Die Walküre en 1856; il pose ajornis la projeto e skribis altra operi. Quankam Wagner volis vartar til ke la projeto esis kompleta ante irga pleado, ilua patrono Ludwig la 2ma di Bayern insistis ke la du kompletigita operi esez pleata.
La finala opero kompletigesis en 1874, e la quar operi esis unesmafoye kune pleata ye Bayreuth dum 13-17 agosto 1876.
Lasta monati
[redaktar | redaktar fonto]Ilua lasta opero Parsifal, kompletigata en januaro 1882, esis unesmafoye pleata dum ta yaro, ye la duesma Festo ye Bayreuth, quan Wagner asistis. Il lore esis malada, pro debila kordio. La familio pose voyajis a Venezia por rezidar ibe dum la vintro. Ye 13 di februaro 1883, en palaco di la 16ma yarcento an la Granda Kanalo, il mortis pro kordio-atako.